जळगाव लाईव्ह न्यूज । १६ मार्च २०२१ । शहर मनपातील सत्ताधारी भाजपचे ३० नगरसेवक फुटीर निघाल्याने एकच खळबळ उडाली आहे. दि.१८ मार्च रोजी महापौर, उपमहापौर निवडीसाठी निवडणूक होणार असून कुणीही गडबड करू नये यासाठी भाजप गटनेते भगत बालाणी यांनी माध्यमात जाहिरात देत व्हीप जारी केला आहे. व्हीपच्या माध्यमातून त्यांनी कायद्याची जाणीव करून देत सर्वांना सूचनाच दिली आहे.
भाजप गटनेते भगत बालाणी यांनी प्रसिद्ध केलेल्या पक्षादेशमध्ये म्हटले आहे की,
पक्षादेश (व्हिप)
सन्मा. सर्व नगरसेवक /नगरसेविका भारतीय जनता पार्टी महानगरपालिका, जळगाव
महोदया,
मी, भारतीय जनता पक्षाचा गटनेता म्हणून आपणांस पक्षादेश (व्हिप) देत आहे की, दिनांक १८ मार्च २०२१ रोजी जळगांव शहर महानगरपालिका महापौर व उपमहापौर पदाची निवडणूक आहे. तरी आपण सदर निवडणूकीत भारतीय जनता पक्षाचे महापौर व उपमहापौर पदाचे अधिकृत उमेदवार यांना वेळेवर ऑनलाईन उपस्थित राहून भारतीय जनता पक्षाचे जे उमेदवार ठरतील त्यांना मतदान करावे. असा पक्षादेश (व्हिप) भारतीय जनता पक्षाचा गटनेता म्हणून आपणांस देत आहे.
सदर पक्षादेशाचे (व्हिपचे) आपण पालन करणे बंधनकारक आहे. सदर पक्षादेशाचे (व्हिपचे) पालन करण्यास आपण कसूर केल्यास महाराष्ट्र स्थानिक प्राधिकरण सदस्य अनर्हता अधिनियम १९८६ चे कलम ३ नुसार महानगरपालिका सदस्य म्हणून अनर्ह होण्यास पात्र रहाल याची नोंद घ्यावी. वरील पक्षादेशाचे (व्हिप)चे आपण काटेकोरपणे पालन करावे.
आपला विश्वासू
(बालाणी भगतराम रावलमल) गटनेता, भारतीय जनता पक्ष जळगांव शहर महानगरपालिका, जळगांव
अशा प्रकारे भाजपचे नगरसेवक फुटू नये म्हणून त्यांना अगोदरच सूचना देत कारवाई होऊ शकते याची जाणीव करून देण्यात आलेली आहे.
हे देखील वाचा :
होय… भाजपचे ३० नगरसेवक फुटले… कुलभूषण पाटलांसह ३३ नगरसेवकांचा शिवसेनेत प्रवेश
जळगाव महानगरपालिकेत विरोधकांचा घोडेबाजार; गिरीश महाजनांची टीका