जळगाव लाईव्ह न्यूज । तुम्हीही राज्य सरकारी कर्मचारी असाल तर तुमच्यासाठी खुशखबर आहे. राज्य सरकारने कर्मचाऱ्यांच्या महागाई भत्त्यात (DA) २ टक्क्यांची वाढ करण्याचा निर्णय घेतला आहे. त्यानुसार नवीन सातवा वेतन आयोग लागू असलेल्या सुधारित वेतन संरचनेतील मूळ वेतनावरील महागाई भत्त्याचा दर ५८ टक्क्यांवरून ६० टक्के करण्यात आला आहे. ही वाढ १ जानेवारी २०२६ पासून लागू होणार आहे.
यासंदर्भात वित्त विभागाने शासन निर्णय जारी केला आहे. या निर्णयामुळे राज्य सरकारी कर्मचाऱ्यांच्या वेतनात वाढ होणार असून, जानेवारी २०२६ पासूनची वाढीव महागाई भत्त्याची थकबाकीही कर्मचाऱ्यांना मिळणार आहे.
जानेवारी ते जुलैची थकबाकी ऑगस्टच्या पगारासोबत
सरकारच्या निर्णयानुसार, जानेवारी २०२६ ते जुलै २०२६ या सात महिन्यांच्या कालावधीतील महागाई भत्ता वाढीची थकबाकी कर्मचाऱ्यांना देण्यात येणार आहे. ही थकबाकी ऑगस्ट महिन्याच्या वेतनासोबत रोखीने देण्याचे आदेश देण्यात आले आहेत.त्यामुळे ऑगस्टच्या पगारासोबत कर्मचाऱ्यांच्या खात्यात नियमित वेतनाव्यतिरिक्त सात महिन्यांच्या वाढीव महागाई भत्त्याची थकबाकी जमा होणार आहे. परिणामी या महिन्यात कर्मचाऱ्यांच्या हातात नेहमीपेक्षा अधिक रक्कम येण्याची शक्यता आहे.
महागाई भत्ता देण्याची पद्धत कायम
महागाई भत्त्याची रक्कम अदा करण्यासंदर्भातील विद्यमान तरतुदी आणि कार्यपद्धती यापुढेही कायम राहणार आहेत. त्यामुळे संबंधित विभागांना सध्याच्या नियमांनुसारच कर्मचाऱ्यांना वाढीव महागाई भत्ता अदा करावा लागणार आहे.
सरकारच्या या निर्णयामुळे महागाईच्या काळात सरकारी कर्मचाऱ्यांना मोठा दिलासा मिळणार आहे. विशेषतः जानेवारीपासूनची सात महिन्यांची थकबाकी एकाच वेळी मिळणार असल्याने ऑगस्टच्या वेतनासोबत कर्मचाऱ्यांना अतिरिक्त आर्थिक लाभ मिळणार आहे.
महागाई भत्ता म्हणजे काय?
महागाई भत्ता म्हणजे Dearness Allowance (DA). महागाईमुळे वाढणाऱ्या जीवनावश्यक वस्तू आणि सेवांच्या किमतींचा परिणाम कमी करण्यासाठी सरकारी कर्मचारी आणि पात्र कर्मचाऱ्यांना हा अतिरिक्त भत्ता दिला जातो. सामान्यतः कर्मचाऱ्याच्या मूळ वेतनाच्या ठराविक टक्केवारीनुसार महागाई भत्त्याची गणना केली जाते. आता महागाई भत्त्याचा दर ५८ टक्क्यांवरून ६० टक्के झाल्याने कर्मचाऱ्यांच्या मूळ वेतनानुसार त्यांच्या मासिक पगारात वाढ होणार आहे. तसेच जानेवारीपासूनची थकबाकी मिळणार असल्याने ऑगस्ट महिन्यात कर्मचाऱ्यांना मोठी रक्कम हातात मिळण्याची शक्यता आहे.
