जळगाव लाईव्ह न्यूज । महाराष्ट्रात दुष्काळाची परिस्थिती निर्माण झाल्याच्या पार्श्वभूमीवर संकटग्रस्त नागरिकांच्या मदतीसाठी जळगाव शहर विधानसभा मतदारसंघाचे आमदार सुरेश दामु भोळे (राजूमामा) यांनी सामाजिक बांधिलकी जपत मुख्यमंत्री सहायता निधीसाठी २ लाख रुपयांचा धनादेश दिला. आज दि. ६ ऑक्टोबर रोजी हा धनादेश मुख्यमंत्री महोदयांकडे सुपूर्द करण्यात आला.
राज्यातील दुष्काळी परिस्थितीमुळे शेतकरी, शेतमजूर तसेच ग्रामीण भागातील अनेक कुटुंबांसमोर आर्थिक अडचणी निर्माण झाल्या आहेत. या पार्श्वभूमीवर शासनाच्या मदत योजनांसोबतच समाजातील सक्षम घटकांनीही पुढाकार घेऊन संकटग्रस्तांना मदतीचा हात देणे आवश्यक असल्याचे आमदार राजूमामा भोळे यांनी सांगितले.
यावेळी बोलताना आमदार भोळे म्हणाले, “दुष्काळ ही केवळ शासनाची जबाबदारी नसून अशा कठीण काळात समाजातील प्रत्येक सक्षम घटकाने आपली सामाजिक बांधिलकी जपणे गरजेचे आहे. आपल्या क्षमतेनुसार केलेली मदत एखाद्या गरजू कुटुंबासाठी मोठा आधार ठरू शकते.”
जळगावसह संपूर्ण महाराष्ट्रातील उद्योजक, व्यापारी, दानशूर नागरिक, सामाजिक व सेवाभावी संस्था तसेच विविध क्षेत्रातील सक्षम व्यक्तींनी मुख्यमंत्री सहायता निधीमध्ये आपल्या क्षमतेनुसार योगदान द्यावे, असे आवाहन आमदार राजूमामा भोळे यांनी केले.
“आज आपण दिलेला मदतीचा हात उद्या एखाद्या कुटुंबाला संकटातून सावरण्याचे बळ देऊ शकतो. दुष्काळाच्या या कठीण काळात ‘मी समाजासाठी काय करू शकतो?’ या भावनेतून प्रत्येकाने पुढे येण्याची गरज आहे,” असेही त्यांनी नमूद केले.
दुष्काळामुळे निर्माण झालेल्या परिस्थितीचा सामना करण्यासाठी शासनाकडून विविध उपाययोजना करण्यात येत आहेत. त्याचबरोबर समाजातील दानशूर आणि सक्षम घटकांनीही योगदान दिल्यास मदतीचा हा प्रयत्न अधिक व्यापक होऊ शकतो. शासनाचा हात आणि समाजाची साथ एकत्र आल्यास अनेक कुटुंबांना संकटातून सावरण्यास मोठा आधार मिळू शकतो, या भावनेतून २ लाख रुपयांचा निधी मुख्यमंत्री सहायता निधीस देण्यात आला आहे.
