जळगाव लाईव्ह न्यूज । १३ मार्च २०२१ । चेतन वाणी । शहर महानगरपालिकेचे बँक खाते महसूल विभागाने सील केले आहेत. जळगाव शहर मनपाकडे अनेक वर्षापासून १३.२५ कोटी थकीत असल्याने कार्यवाही करण्यात आल्याची माहिती प्रांताधिकारी तृप्ती धोडमिसे यांनी जळगाव लाईव्ह न्यूजशी बोलताना दिली.

नेहमी काही न काही कारणाने चर्चेत राहणाऱ्या जळगाव मनपावर पुन्हा एकदा नामुष्की ओढवली आहे. महसूल विभागाच्या थकीत असलेल्या १३.२५ कोटी रकमेमुळे महसूल विभागाने मनपाची बँक खाती गोठवली आहेत. ऐन कोरोनाच्या काळात कारवाई झाल्याने अनेक अडचणी उभ्या राहणार आहेत. जळगाव उपविभागीय अधिकारी तृप्ती धोडमिसे यांनी याबाबत दुजोरा दिला असून जळगाव मनपाच नव्हे इतर देखील काही विभाग आणि कार्यालयांची खाती गोठवली असल्याचे त्यांनी सांगितले.

जळगाव लाईव्ह न्यूज । १२ मार्च २०२१ । जळगाव जिल्ह्यात कोरोनाचा उद्रेक पाहायला मिळत असून वाढणारी रुग्ण संख्या लक्षात घेता जिल्हाधिकाऱ्यांनी गृहविलगीकरणाचे नियम पुन्हा कठोर केले आहेत. ६० वर्षांवरील ज्येष्ठ अथवा अन्य आजार असलेल्या नागरिकांना गृहविलगीकरणाची परवानगी नसेल. 

जिल्ह्यात मागील महिन्यापासून कोरोना बाधित रुग्णांची संख्या अचानक वाढू लागली आहे. वाढणारी रुग्ण संख्या लक्षात घेता जिल्ह्यात बहुतांश भागात जनता कॅर्फ्यू लागू करण्यात आला आहे. जिल्ह्यात सर्वाधिक रुग्ण जळगाव शहरात आढळून येत आहे. शहरात कोरोना संसर्गाची साखळी तोडण्यासाठी तीन दिवसाचा जनता कॅर्फ्यू लावण्यात आला आहे. तरी देखील रुग्ण संख्या मोठ्या प्रमाणात आढळून येत आहे.

गृहविलगीकरणाची मान्यता अपवादात्मक स्थितीत, लक्षणे नसलेल्या व अतिसौम्य लक्षणे असलेल्या रुग्णांनाच मिळू शकेल. त्यासाठी काही निकष पूर्ण करावे लागतील. हे निकष पूर्ण केले जात नसतील तर प्रत्येक रुग्णाने कोविड केअर सेंटर, डेडिकेटेड कोविड केअर सेंटर, डेडिकेटेड कोविड हॉस्पिटलमध्ये दाखल होणे गरजेचे आहे.

गृह विलगीकरणासाठीचे नियम 

– लक्षणे सौम्य, अतिसौम्य असल्याबाबत वैद्यकीय अधिकाऱ्याने प्रमाणित केलेले असावे

– विहित नमुन्यात रुग्णाला त्याच्या कुटुंबातील सदस्यांसह उपचार करणाऱ्या डॉक्टरच्या नावाचा उल्लेख असावा

– संबंधित रुग्णाच्या घरी एकच कुटुंब असावे

– गृहविलगीकरणात दोन स्वतंत्र शौचालय, बाथरुमसह चार खोल्यांचे घर असावे

– घरी रात्रंदिवस, २४ तास काळजी घेणारी व्यक्ती असावी

– या सर्व सुविधा आहेत की नाही, याची खातरजमा तलाठी, ग्रामसेवक, नगरपालिका व मनपा स्तरावर संबंधित अधिकाऱ्यांनी करावी

– रुग्णाने स्वतःचे गृह विलगीकरण करण्याविषयी प्रतिज्ञापत्र (परिशिष्ट-1) भरुन द्यावे व सर्व मार्गदर्शक सूचनांचे पालन करावे. प्रतिज्ञापत्र दिल्यांनतर सदरील व्यक्तीस गृह विलगीकरणासाठी पात्र ठरविण्यात येईल.

-वर नमूद सर्व अटी व शर्तीचे पालन करणाऱ्या व्यक्तींना जळगांव महानगरपालिका कार्यक्षेत्रात आयुक्त, मनपा जळगांव तथा Incident Commander यांनी नेमून दिलेला अधिकारी परवानगी देईल. तसेच उव्वरित जळगांव जिल्हयाकरिता संबंधित उपविभागीय अधिकारी तथा Incident Commander यांनी गृह विलगीकरणासाठी तसेच गृह उपचारासाठी परवानगी देण्याची कार्यवाही करावी.

जळगाव लाईव्ह न्यूज । १२ मार्च २०२१ । जळगाव शहरात कोरोना बाधितांची संख्या झपाट्याने वाढू लागली असून हाॅटस्पाॅट ठरलेल्या शहरातील जिल्हा परिषदेच्या दाेन्ही इमारतीमध्ये दरराेज नवनवीन रूग्णांची संख्या वाढत आहे. शुक्रवारी बांधकाम विभागात आणखी दाेन कर्मचाऱ्यांना काेराेना संसर्ग झाल्याने या विभागाला प्रशासनाकडून तातडीने कुलूप लावण्यात आले.

मार्च अखेर असल्याने जिल्हा परिषदेच्या बांधकाम विभागात सध्या कंत्राटदार आणि जिल्हा परिषद सदस्यांची यात्रा भरलेली असते. गेल्या दाेन महिन्यापासून या विभागात रात्री उशिरापर्यंत कंत्राटदारांची गर्दी असते. टेबलभोवती कर्मचाऱ्यासोबत ठेकेदार फाईल मार्गी लावण्यासाठी तासंतास बसून असतात. काेराेनाचा संसर्ग वाढला असतांना बांधकाम विभागातील वाढत्या गर्दीचा विषय पुन्हा चव्हाट्यावर आला होता. प्रशासनाने निर्बंध लावूनही ही गर्दी कमी हाेत नव्हती. शेवटी शुक्रवारी दाेन कर्मचारी काेराेना संक्रमित झाल्याचे तपासणीमध्ये दिसून आल्यानंतर या विभागाला तत्काळ कुलूप लावण्यात आले.

विभागातील इतर कर्मचाऱ्यांना क्वाॅरंटाईन होण्याच्या सूचना देण्यात आल्या. मार्च अखेर असल्याने बहुतांश सदस्य आणि ठेकेदारांची कामे याच विभागाशी निगडीत होती. सकाळीच हा विभाग बंद करण्यात आल्याची माहिती मिळाल्याने काहीशी गर्दी ओसरली होती.जिल्हा परिषदेतील बांधकाम विभागाच्या कार्यालय कुलूप लावून बंद केलेले आहे.

जळगाव लाईव्ह न्यूज । १२ मार्च २०२१ । कोरोना पार्श्वभूमीवर  गेल्या वर्षभरापासून सर्व रेल्वे पॅसेंजर गाड्या बंद आहेत. परिणामी अप-डाऊन करणाऱ्या चाकरमान्यांचे हाल होत आहेत. 

भुसावळ, जळगाव येथून सुरतकडे जाणारे अनेक प्रवासी असतात. त्यात नोकरीच्या निमित्ताने अपडाऊन करणाऱ्या चाकरमान्यांची संख्याही मोठ्या प्रमाणात आहे. परंतु, पॅसेंजर गाड्या बंद असल्याने त्यांना आर्थिक भूर्दंड सहन करावा लागतो आहे.

या पार्श्वभूमीवर डीआरएम यांची भेट घेऊन त्यांना निवेदन देण्यात येईल. तसेच रेल्वे मंत्र्यांनाही एक निवेदन पाठवण्यात येणार असल्याचे पीपल्स रिपब्लिकन पार्टीचे उत्तर महाराष्ट्राचे नेते जगन सोनवणे यांच्याकडून कळवण्यात आले.