जळगाव लाईव्ह न्यूज । २६ जुलै २०२४ । वर्षानुवर्षे ऐनकेन कारणाने प्रलंबित राहणारे खटले आर्थिक चणचण, वेळेचा अपव्यय या सर्व गोष्टी टाळण्यासाठी व आपसात सामोपचाराने तडजोड घडवुन वाद मिटवुन घेण्याकरीता राष्ट्रीय विधी सेवा प्राधिकरण, नवी दिल्ली यांच्या निर्देशानुसार संपुर्ण देशात एकाच दिवशी राष्ट्रीय लोकअदालत दि. २७/०७/२०२४ रोजी आयोजित करण्यात येत आहे. अशी माहिती जिल्हा विधी सेवा प्राधिकरण, जळगांव तर्फे देण्यात आली. याचा अधिकाधिक लोकांनी फायदा घ्यावा असे आवाहन जिल्हा विधी सेवा प्राधिकरण यांच्याकडून करण्यात आले आहे.

लोकन्यायालय म्हणजे काय? वाद उद्भवला तर तो शक्य तोवर सामंजस्याने सोडवावा ही आपली प्राचीन परंपरा आहे. गावातील जुनी जाणती माणसे एकत्र येत आणि कोणत्याही व्यक्तींमध्ये उद्भवलेला वाद समजुतीने मिटवत. ज्यांच्यापुढे वाद जाई ते गावातील आदरणीय आणि निष्पक्षपाती लोक असत. त्यालाच गावात गावपंचायत असे म्हणत सध्याचे लोक न्यायालय म्हणजे या गावपंचायतीचे आधुनिक रूप जेथे कायदा जानणाऱ्या निष्पक्षपाती लोकांचे न्याय मंडळापुढे येणाऱ्या प्रकरणांमध्ये सामंजस्याने न्याय तडजोड घडविते.

जिल्हा विधी सेवा प्राधिकरण, जळगांव तर्फे सांगण्यात आले की, मा. ना. राष्ट्रीय विधी सेवा प्राधिकरण, नवी दिल्ली व मा. महाराष्ट्र राज्य विधी सेवा प्राधिकरण, मुंबई यांनी दिलेल्या निर्देशानुसार राज्यातील सर्व जिल्हात या लोकअदालतीचे आयोजन केलेले असुन विधी सेवा प्राधिकरण, जळगांव व जिल्हा वकील संघ, जळगांव यांचे संयुक्त विद्यमाने एकाच दिवशी ही राष्ट्रीय लोकअदालत जळगांव जिल्हातील संपुर्ण न्यायालयात आयोजीत केली जाईल. जळगांव येथे जिल्हा व सत्र न्यायालयाचे प्रमुख जिल्हा व सत्र न्यायाधीश श्री. एम. क्यु. एस. एम. शेख साो. तथा अध्यक्ष, जिल्हा विधी सेवा प्राधिकरण यांचे अध्यक्षतेखाली लोकअदालतीस प्रारंभ होईल.

या राष्ट्रीय लोक अदालतीमध्ये मोटार वाहन ट्रॉफीक चलान, भुसंपादन, धनादेश अनादर, वैवाहिक खटले, मोटार अपघात खटले, म्युनिसीपल अपील, दिवाणी व फौजदारी प्रकरणे, न्यायालयात प्रलंबित इतर खटले इ. चे व खटला दाखल पुर्व प्रकरणे तसेच एकुण ज्या खटल्यांमध्ये कायद्याने तडजोड करता येते असे संपुर्ण खटले तडजोडीने निकाली काढण्यासाठी ठेवण्यात आलेले आहेत. राष्ट्रीय लोकअदालतीचे फायदे असे की, निकाल झटपट लागतो, उलटतपासणी, दिर्घ युक्तीवाद या बाबी टाळल्या जातात, निकाल झटपट लागतो, लोकन्यायालयाच्या निवाडया विरूध्द अपील नाही एकाच निर्णयात कोर्टबाजीतून कायमची सुटका होते, लोकन्यायालयात होणारा निवाडा हा आपसात समजुतीने होत असल्याने कोणाचा ना जय होतो, ना हार होते, लोकन्यायालयाचा निवाडा दोन्ही पक्षांना समाधान देतो, परस्पर संमतीने निकाल होत असल्याने एकमेकांतील द्वेष वाढत नाही व कटुता ही निर्माण होत नाही, कोर्टाच्या हुकुमनाम्याप्रमाणे लोकन्यायालयात होणाऱ्या निवाडयाची अमंलबजावणी कोर्टामार्फत करता येते, वेळ आणि पैसा दोन्हींचीही बचत होते, लोकन्यायालयात निकाली निघणाऱ्या प्रकरणांमध्ये कायदयानुसार कोर्ट फि ची रक्कम मिळते.

त्याचप्रमाणे जळगांव येथील औद्योगिक, कामगार, सहकार न्यायालय तसेच ग्राहक तक्रार निवारण मंच येथील तडजोड योग्य प्रकरणे देखिल त्या-त्या न्यायालयांमध्ये राष्ट्रीय लोकअदालतीमध्ये निकाली केले जाणार आहेत. या राष्ट्रीय लोकअदालतीमध्ये आपसांत तडजोडीसाठी संपुर्ण जिल्हातून मोठ्या प्रमाणावर खटले ठेवण्यात आलेले आहेत. तसेच या राष्ट्रीय लोकअदालतीमध्ये राष्ट्रीयकृत बँका, कंपनी यांचे प्रलंबित असलेल्या दिवाणी व फौजदारी खटल्यांमध्ये मोठ्या प्रमाणात रक्कम वसुली होवुन मिळण्याची शक्यता आहे. वादपुर्व खटल्यांमध्ये बँका, कंपन्या, भ्रमणध्वणी कंपन्या, दुरध्वणी कार्यालयांनी थकीत रकमेमध्ये सूट देण्याबाबत प्रस्थावित केलेले आहे.

ज्या पक्षकारांना तडजोडीने सदरचे आपली प्रकरणे निकाली काढायची असतील अशा संबंधीत सर्व पक्षकार व त्यांचे विधिज्ञ यांनी उपस्थित राहून तडजोडीने आपआपले खटले निकाली काढावे. तसेच ऐनवेळी ज्या पक्षकारांना आपले खटले तडजोडीने निकाली काढण्यासाठी ठेवायचे असतील त्यांना सुध्दा ऐनवेळी खटले निकाली काढण्याची संधी देण्यात आलेली आहे. या सुवर्णसंधीचा लाभ घ्यावा, व जास्तीत जास्त खटले दि २७/०७/२०२४ रोजीच्या राष्ट्रीय लोकअदालतीत समोपचाराने निकाली करून घ्यावे, असे आवाहन जिल्हा विधी सेवा प्राधिकरण, जळगांव तर्फे करण्यात आलेले आहे.

जळगाव लाईव्ह न्यूज । २६ जुलै २०२४ । राज्यातील अनेक ठिकाणी मुसळधार पावसामुळे जनजीवन विस्कळीत झाले आहे. नंदुरबारमधील नवापूर तालुक्यातही अतिवृष्टी झाली असून यामुळे सुरत- भुसावळ रेल्वे मार्गावर रेल्वे प्रशासनाचा बोजवरा उडाला आहे.

गुरुवारी रात्री झालेल्या मुसळधार पावसामुळे चिंचपाडा रेल्वे स्थानक परिसरात रुळावर पाणी व मातीचा भराव वाहून आल्याने यात मालवाहू गाडी अडकल्याने सुरत- भुसावळ रेल्वे सेवा पूर्णपणे विस्कळीत झाली आहे. रुळावर वाहून आलेला मातीचा भराव काढण्याचे काम युद्ध पातळीवर सुरु करण्यात आले आहे.

चिंचपाडा रेल्वे स्थानकाजवळ महामार्गाच्या उड्डाणपुलाच्या पुलाखाली रेल्वे मार्गाला कोणतीही संरक्षण भिंत नसल्यामुळे पावसाचे पाणी मोठ्या प्रमाणात वाहून आले. तसेच पाण्यासोबत मातीचा ढिगारा देखील वाहून आला आहे. त्यामुळे (Railway) रेल्वे रुळावर पाणी मोठ्या प्रमाणात साचले त्यासोबत रेल्वे रुळावर माती आल्याने रेल्वे रुळ माती खाली गेल्याने रेल्वे मालगाडी रेल्वे रुळावर चिंचपाडा गावाजवळ अडकल्याने सुरत भुसावळ रेल्वे मार्गावर रेल्वे सेवा विस्कळीत झाली आहे. परिणामी या मार्गावरील अनेक रेल्वे गाड्या या विविध स्टेशनवर थांबून आहेत. गेल्या तीन ते चार तासांपासून रेल्वेची वाहतूक झाली आहे बंद आहे.

जळगाव लाईव्ह न्यूज । गेल्या १० वर्षांपासून बँक ऑफ बडोदा, वर्धापन दिनानिमित्त दरवर्षी दि.२० जुलै रोजी रोटरी क्लब ऑफ भुसावळ, इनरव्हील क्लब भुसावळ यांच्या संयुक्त विद्यमाने व डॉ. उल्हास पाटील वैद्यकीय महाविद्यालयातील रक्तपेढी यांच्या सहकार्याने रक्तदान शिबिराचे आयोजन केले जात असून दशकपुर्तीनिमीत्‍त इनरव्हीलच्या अध्यक्षा राजश्री कात्यायनी यांचा आज गोदावरीतर्फे सत्कार करण्यात आलाृ.

डॉ. उल्हास पाटील वैद्यकीय महाविद्यालय व रुग्णालयात रोटेरियन ब्रह्मदत्त शर्मा गोदावरी फाऊंडेशन रक्तपेढी सुरुवातीपासून कार्यरत आहे. गेल्या १० वर्षात ३०० पेक्षा जास्त बॅगचे रक्तसंकलन शिबिरातून करण्यात आले आहे. या स्तुत्य उपक्रमाबद्दल इनरव्हील क्लबच्या अध्यक्षा सौ. राजश्री कात्यायनी यांचा सत्कार गोदावरी फाऊंडेशनचे अध्यक्ष तथा माजी खासदार डॉ.उल्हास पाटील यांच्या हस्ते प्रमाणपत्र देवून करण्यात आला.

यावेळी श्री. विकास कात्यायनी तसेच डॉ. उल्हास पाटील वैद्यकीय महाविद्यालय व रुग्णालयाचे वैद्यकीय संचालक (व रोटरी क्लब ऑफ भुसावळचे माजी अध्यक्ष) डॉ. एन. एस. आर्विकर हे उपस्थित होते. या कामी रोटरी क्लब ऑफ भुसावळ व इनरव्हील क्लब ऑफ भुसावळच्या सर्व सदस्यांचे सहकार्य लाभले.

जळगाव लाईव्ह न्यूज । गोदावरी फाउंडेशन संचलित गोदावरी अभियांत्रिकीतील संगणक विभागाचा श्रीवत्स निगम ची मास्टर ऑफ सायन्स एम.एस. अभ्यासक्रमासाठी नुकतीच निवड झाली आहे.

श्रीवत्स हा परदेशात प्रवेश मिळवण्यासाठी पहिल्यापासूनच प्रयत्नशील होता. त्याने अमेरिकेतील विविध विद्यापीठातील महाविद्यालयांच्या प्रवेश परीक्षा दिल्या होत्या. त्यापैकी आई इ एल टी एस या प्रोइफिशियन्सी टेस्ट मध्ये त्याने दैदीप्यमान यश संपादन केले. त्यामुळे त्याला बिंगहॅमटन स्टेट युनिव्हर्सिटी न्यूयॉर्क, यूएसए येथे सिस्टीम सायन्स या मास्टर ऑफ सायन्स (एम एस) प्रोग्राम साठी प्रवेश मिळाला.श्रीवत्स निगमचे महाविद्यालयाचे प्राचार्य डॉ. विजयकुमार पाटील यांनी विशेष अभिनंदन व सत्कार केला.

कार्यक्रमाप्रसंगी महाविद्यालयाचे डॉ. हेमंत इंगळे (अधिष्ठाता), डॉ. विजयकुमार वानखेडे (ट्रेनिंग अँड प्लेसमेंट ऑफिसर), प्रा.निलेश वाणी (संगणक विभाग प्रमुख) डॉ. नितीन भोळे (बेसिक सायन्सेस अँड हुम्यानिटीज प्रमुख), प्रा. तुषार कोळी (यंत्र विभाग प्रमुख), डॉ. अनिल कुमार विश्वकर्मा (आर्टिफिशियल इंटेलिजन्स अँड डाटा सायन्स प्रमुख), प्रा. महेश पाटील (विद्युत विभाग प्रमुख) तसेच प्रा. निलेश चौधरी, प्रा. प्रशांत शिंपी हे उपस्थित होते. श्रीवत्सच्या यशाबद्दल गोदावरी फाउंडेशनचे अध्यक्ष डॉ. उल्हास पाटील, डॉ. वर्षा पाटील(सचिव), डॉ. केतकी पाटील (सदस्य) तसेच डॉ. वैभव पाटील (डी. एम. कार्डिओलॉजी) यांनी अभिनंदन करून कौतुक केले. तसेच महाविद्यालयाचे प्राचार्य डॉ. विजयकुमार पाटील आणि सर्व विभाग प्रमुख व प्राध्यापक वर्ग यांनी त्याच्या पुढील शैक्षणिक वाटचालीसाठी शुभेच्छा दिल्या.