जळगाव लाईव्ह न्यूज । १२ फेब्रुवारी २०२२ । ‘मतदार हे कामाचं मूल्यमापन करत असतात. निवडणूक लागली की सकाळी शिवसेनेचं मटण खातात, दुपारी भाजपची शेवभाजी खातात. रात्री काँग्रेसचं जेवण करतात. खातात कुणाचं मटण आणि दाबतात कुणाचं बटण हेच कळत नाही,असं पालकमंत्री गुलाबराव पाटील म्हणाले आहे. भुसावळ येथील रस्त्याच्या कामाचं भूमिपूजन गुलाबराव पाटील यांच्या हस्ते आज झालं. त्यावेळी त्यांनी आपल्या खास ग्रामीण शैलीत उपस्थितांनी संवाद साधला. मतदारांच्या हुशारीचंही त्यांनी कौतुक केलं.
माझ्या मतदारसंघातील रस्ते अभिनेत्रीच्या गालासारखे गुळगुळीत असल्याचं वक्तव्य पाटील यांनी नगरपंचायत निवडणुकीच्या प्रचारादरम्यान केलं होतं. आज त्या वक्तव्याची आठवण करत खराब रस्ते चांगले करण्याचा प्रयत्न करत असल्याचं सांगताना मी जे बोलून गेलो, त्यातून कुणाचेही मन दुखवण्याचा माझा हेतू नव्हता. मागच्या भाषणावेळी माझ्या शब्दांचा विपर्यास केला गेला. वृत्तवाहिन्यांनी माझं ते वक्तव्य प्रचंड चालवलं. त्यामुळं आता तो गाल सोडला आणि ओम पुरीचा गाल पकडलाय. आता त्यावरून तरी कोणी टीका करू नये, अशी मिश्किल टिप्पणी त्यांनी केली. त्यांच्या या वक्तव्यावरही हंशा पिकला.
पालकमंत्री गुलाबराव पाटील यांच्या प्रमुख उपस्थितीत शनिवारील शहरातील विविध भागात सहा कोटी 22 लाख रुपये किंमतीच्या विकासकामांचे उद्घाटन करण्यात आले. शहरातील श्रीनगर व जामनेर रोडवरील मान रेसीडेन्सीजवळ तसेच डी.एस.हायस्कूलमध्ये पालकमंत्र्यांच्या उपस्थितीत विकासकामांचा शुभारंभ झाला.
यांची व्यासपीठावर उपस्थिती
व्यासपीठावर आमदार संजय सावकारे, प्रशासक तथा प्रांताधिकारी रामसिंग सुलाणे, माजी नगराध्यक्ष रमण भोळे, जिल्हाप्रमुख समाधान महाजन, डीवायएसपी सोमनाथ वाघचौरे, बाजारपेठ पोलिस निरीक्षक राहुल गायकवाड, मुख्याधिकारी संदीप चिद्रवार, विश्वनाथ पाटील आदी उपस्थित होते.
भाजपचे आणखी काही नगरसेवक शिवसेनेत येणार?
शिवसेनेत प्रवेशांनंतरही काही नगरसेवकांनी शिवसेनेत प्रवेश केला नसल्याच्या चुकीचं बातम्या चालवल्या जात आहेत. प्रत्यक्षात ते नगरसेवक माझ्या घरी आले होते. मी कुणाच्या घरी गेलो नव्हतो. कुणीही कुणाच्या गळ्यात जबरदस्ती पक्षाचा फडका टाकत नाही. त्यांनी पक्षाचा फडका गळ्यात टाकून घेतला, असं पाटील म्हणाले. जळगाव महापालिकेच्या ४० नगरसेवकांसोबत आज माझी बैठक आहे. आणखी काही नगरसेवक शिवसेनेत येणार आहेत, असा दावाही त्यांनी केला.
हे देखील वाचा :
- गर्भ पोटातच फुटलेल्या महिलेचा शस्त्रक्रियेमुळे वाचला जीव
- टायर फुटल्याने मजुरांनी भरलेली आयशर पलटी; यावल-फैजपूर रस्त्यावरील भीषण अपघात!
- तृतीयपंथीय विद्यार्थ्यांना मिळणार वार्षिक १३,५०० रुपये; जाणून घ्या पात्रता अन् अर्ज प्रक्रिया
- जळगाव पोलिसांची मोठी कारवाई; तब्बल ९५८ किलो गांजाची कायदेशीर विल्हेवाट
- जळगाव-भुसावळकरांसाठी खुशखबर! ‘बडनेरा-नाशिक मेमू’ रेल्वेला ३० सप्टेंबरपर्यंत मुदतवाढ
