जळगाव लाईव्ह न्यूज । ५ मे २०२५ । सध्या देशात ५%, १२%, १८% आणि २८% असे चार जीएसटी स्लॅब आहेत. जुलै महिन्यामध्ये केंद्राच्या जीएसटी समितीची पुढील बैठक पार पडणार असून, त्या बैठकीमध्ये केंद्रीय समिती मोठा निर्णय घेणार असून त्यात कौन्सिल चार स्लॅबवरून तीन करण्याचा विचार करत आहे. सूत्रांच्या माहितीनुसार सध्या समितीकडून 12 टक्के जीएसटी हटवण्यासाठीचा प्रस्ताव तयार केला जात असून, करप्रणालीत सुसूत्रता आणण्यासाठी या निर्णयाकडे आशादायी नजरेनं पाहिलं जात आहे.
एचटीमध्ये प्रकाशित झालेल्या बातमीनुसार, सामान्य लोक वापरत असलेल्या आवश्यक वस्तू ५% स्लॅबमध्ये ठेवता येतात. तर, उर्वरित गोष्टींना 18% जीएसटीच्या श्रेणीत स्थान दिलं जाऊ शकतं. सरकारच्या मिळकतीला हात न लावता कर कमी करण्यासाठीचा हा एक उत्तम उपाय समजला जात आहे.
१२% स्लॅबमध्ये काय समाविष्ट आहे?
सध्या देशात ५%, १२%, १८% आणि २८% असे चार जीएसटी स्लॅब आहेत. सध्या, आवश्यक वस्तूंवर कमी कर ठेवण्यात आला आहे आणि लक्झरी वस्तूंवर जास्त कर ठेवण्यात आला आहे. पॅक न केलेल्या अन्नपदार्थांवर, मीठ, दूध, ताज्या भाज्या, गरिबांसाठी शिक्षण आणि आरोग्य सेवांवर कोणताही कर नाही.
१२% कर स्लॅबमध्ये येणाऱ्या गोष्टी
> कंडेन्स्ड मिल्क, कॅविअर, २० लिटरच्या बाटल्यांमध्ये पॅक केलेले पिण्याचे पाणी
> वॉकी-टॉकी, टाक्या आणि चिलखती वाहने, कॉन्टॅक्ट लेन्स
> चीज, खजूर, सुकामेवा, सॉस
> पास्ता, जाम, जेली, फळांच्या रसाचे पेये, स्नॅक्स
> टूथ पावडर, फीडिंग बाटल्या, कार्पेट, छत्री, टोप्या
> सायकली, घरगुती भांडी, लाकडी किंवा बांबूचे फर्निचर
> पेन्सिल, क्रेयॉन, ज्यूट किंवा कापसाच्या पिशव्या आणि १००० रुपयांपेक्षा कमी किमतीचे शूज
> डायग्नोस्टिक किट, मार्बल आणि ग्रॅनाइट ब्लॉक
काय स्वस्त आणि काय महाग?
जर जीएसटी परिषदेच्या बैठकीत १२% कर स्लॅब काढून टाकण्याचा निर्णय घेतला तर त्याअंतर्गत येणाऱ्या गोष्टी ५ आणि १८% स्लॅबमध्ये हलवल्या जातील. १२ ते ५% स्लॅबमधून जाणाऱ्या गोष्टी जसे की मसाले आणि रॉकेल इत्यादी स्वस्त होण्याची अपेक्षा आहे. दुसरीकडे, डिटर्जंट्स आणि प्लास्टिकच्या वस्तू इत्यादी १२ ते १८% स्लॅबमधून जाणाऱ्या गोष्टी महाग होऊ शकतात.
