⁠ 
गुरूवार, मार्च 28, 2024

ज्ञानवापी मशीद : दिवाणी न्यायालयात उद्या होणार सुनावणी, ‘या’ विषयावर होणार निर्णय

जळगाव लाईव्ह न्यूज । २३ मे २०२२ । देशभरात सध्या ज्ञानवापी मशिदीचा मुद्दा चर्चेत आहे. वाराणसीतील काशी विश्वनाथ मंदिराला लागून असलेल्या ज्ञानवापी मशिदीचा खटला सर्वोच्च न्यायालयाच्या आदेशानुसार दिवाणी न्यायाधीशांच्या न्यायालयातून जिल्हा न्यायाधीशांकडे वर्ग करण्यात आला आहे. सोमवारी वाराणसीच्या न्यायाधीशांसमोर खटल्याला सुनावणी सुरु झाली. उद्या यावर एक महत्वाचा निर्णय होणार आहे.

सर्वोच्च न्यायालयाच्या आदेशावर सोमवारी वाराणसीच्या जिल्हा न्यायाधीशांसमोर सुनावणी सुरू झाली. दिवाणी न्यायाधीशांच्या न्यायालयातील सर्व फायली जिल्हा न्यायाधीशांच्या न्यायालयात पोहोचल्या आहेत, परंतु न्यायालयाला सर्व फायली अद्याप पाहावयाच्या आहेत. न्यायालयात दोन्ही बाजूंनी आपापल्या मागण्या मांडल्या मात्र न्यायालयाने कोणताही निर्णय न देता सुनावणी उद्यापर्यंत पुढे ढकलली आहे. प्रथम याचिका कायम ठेवण्याच्या दाव्यावर सुनावणी करायची की प्रथम शृंगार गौरी प्रकरणातील आक्षेपांवर सुनावणी करायची याविषयी उद्या न्यायालय निर्णय घेणार आहे.

सोमवारी न्यायालयात सुमारे ४५ मिनिटे दोन्ही बाजूंनी आपले म्हणणे मांडले. 711 (पूजेची ठिकाणे कायदा) कायम ठेवण्याबाबतची पहिली सुनावणी मुस्लिम पक्षाला हवी होती. तर हिंदू बाजूने ते इतरांसोबत ऐकले जावे अशी इच्छा होती. हिंदू पक्षाने न्यायालयाकडे आयोगाचा अहवाल, व्हिडिओ आणि फोटोंची मागणी केली आहे. विष्णू जैन यांच्या म्हणण्यानुसार या प्रकरणाची प्रक्रिया काय असेल हे उद्या न्यायालय ठरवेल. या संपूर्ण प्रकरणाची सुनावणी घेतल्यानंतर न्यायालयाने उद्या दुपारी २ वाजेपर्यंत निर्णय राखून ठेवला आहे. याप्रकरणी मंगळवारी अन्य पुरवणी याचिकांवरही विचार करण्याचे न्यायालयाने ठरवले आहे. या प्रकरणाच्या सुनावणीची प्रक्रिया काय असेल हे मंगळवारी न्यायालयाला सांगण्यात येणार आहे. याशिवाय पुढील सुनावणीची तारीखही कळवण्यात येणार आहे.

वाराणसीत ज्ञानवापीवरून सध्या वातावरण तापले असल्याने आज न्यायालयीन सुनावणी सुरू होण्यापूर्वी न्यायालयाच्या बाहेर मोठ्या प्रमाणात पोलीस बंदोबस्त तैनात करण्यात आला होता. बॅरिकेड करून केवळ पक्षकार आणि वकिलांनाच प्रवेश दिला जात होता. सर्वेक्षणासाठी यापूर्वी नियुक्त केलेले आयुक्त अजय मिश्रा यांचेही नाव यादीत नसताना त्यांना परत करण्यात आले. गेल्या सुनावणीदरम्यान अजय मिश्रा यांना आयुक्तपदावरून हटवण्यात आले होते. न्यायाधिशांनी न्यायालयात जाण्यासाठी पोलिसांना यादी दिली आहे. या यादीच्या आधारे प्रवेश देण्यात आले.