जळगाव लाईव्ह न्यूज । ११ मार्च २०२०२१ । पोट दुखण्याचा बहाणा करुन मध्य प्रदेशातील बालसुधारगृहातून पलायन केलेल्या अल्पवयीन अट्टल चोरट्यास स्थानिक गुन्हे शाखेच्या पथकाने गुरुवारी चोपड्यातून ताब्यात घेतले असून त्याच्याकडून चोरी केलेल्या दोन दुचाकी हस्तगत करण्यात आल्या आलेल्या आहेत. 

संशयित अल्पवयीन चोरट्याला मध्य प्रदेश पोलिसांनी घरफोडी व दुचाकी चोरीच्या गुन्ह्यात पकडले होते. तेथील मुद्देमाल हस्तगत केल्यानंतर त्याला तेथी बालसुधारगृहात पाठविण्यात आले होते. तेथे पोट दुखत असल्याचा बहाणा करुन त्याने तेथून पलायन केले होते. याबाबत मध्य प्रदेशातील कोतवाली झाबुवा पोलीस स्टेशनला गुन्हा दाखल झाला होता. त्याने पलायन केल्यामुळे तेथील दोन पोलिसांवर निलंबनाची कुऱ्हाड कोसळली होती.

दरम्यान, एरंडोल व धरणगाव येथील चोरलेल्या दोन दुचाकी चोपड्यात आलेल्या अल्पवयीन मुलाकडे असल्याची माहिती स्थानिक गुन्हे शाखेचे अशरफ शेख यांना मिळाली होती. पोलीस निरीक्षक किरण बकाले यांनी अशरफ शेख, दीपक शिंदे, इद्रीस पठाण व भारत पाटील यांचे पथक रवाना केले होते. या पथकाने या चोरट्याला मिळालेल्या माहितीच्या ठिकाणावरुनच ताब्यात घेतले. त्याच्याजवळ एक दुचाकी होती, अधिकच्या चौकशीत आणखी एक दुचाकी चोरल्याची कबुली देत दोन्ही दुचाकी काढून दिल्या. त्याशिवाय शिरपूर व धुळे येथेही घरफोडी व दुचाकी चोरी केल्याची कबुली त्याने दिली.

जळगाव लाईव्ह न्यूज । १० मार्च २०२१ । विष प्राशन केलेल्या २२ वर्षीय तरुणाचा जिल्हा रूग्णालयात उपचारादरम्यान मृत्यू झाल्याची घटना आज मध्यरात्री घडलीय. गोकुळ सुकदेव सपकाळे (वय-२२, रा. भोलाणे ता.जि.जळगाव) असे मृत तरुणाचे नाव आहे. दरम्यान,याप्रकरणी तालुका पोलीसात अकस्मिक मृत्यूची नोंद करण्यात आली आहे.

नातेवाईकांकडून मिळालेल्या माहितीनुसार, गोकुळ सपकाळे हा भोलाणे येथे आई वडीलांसह वास्तव्यास होता. त्याचे भोलाणे शिवारात शेत असून शेती व मोलमजूरी करून कुटुंबाचा उदरनिर्वाह करतो. दरम्यान, बुधवार १० मार्च रोजी दुपारी १ ते १.३० वाजेच्या सुमारास शेतात काम करत असतांना शेतासाठी लागणारे विषारी औषध गोकुळ सपकाळेने घेतले. विषारी औषध घेतल्यानंतर तश्याच अवस्थेत गावात आला. त्याचा चुलतभाऊ जगदीश सपकाळे आपण विषारी औषध घेतल्याचे सांगितले. त्याला तातडीने खासगी रूग्णालयात उपचारार्थ दाखल केले. मध्यरात्री २ वाजेच्या सुमारास त्याचा उपचारादरम्यान मृत्यू झाला. याप्रकरणी तालुका पोलीसात अकस्मात मृत्यूची नोंद करण्यात आली आहे.

मयताच्या पश्चात आई सुलाबाई, वडील सुकदेव सपकाळे, तुकाराम आणि मदन हे दोन मोठे भाऊ, दोन विवाहित बहिणी असा परिवार आहे. दोन्ही मोठे भाऊ विवाहित असून कुटुंबासह ठाणे येथे राहतात. तर गोकुळ हा अविवाहित असून आत्महत्या करण्याचे कारण अद्याप समजू शकले नाही.