जळगाव लाईव्ह न्यूज । २८ एप्रिल २०२१ । जामनेर तालुक्यातील प्रसिद्ध व्यावसायिक माजी नगराध्यक्ष पारस ललवाणी यांच्याविरोधात काही महिन्यांपूर्वी एका महिलेने विनयभंगची तक्रार केल्याने पोक्सो अंतर्गत गुन्हा दाखल करण्यात आला होता. गुन्हा मागे घेत न्यायालयात ललवाणी यांच्या बाजूने साक्ष देण्यासाठी महिलेने तब्बल २५ लाखांची खंडणी मागितली असून रक्कम स्विकारताना रंगेहाथ पकडण्यात आले आहे. लासलगाव पोलिसात याप्रकरणी आ.गिरीष महाजन यांचे निकटवर्तीय समजले जाणारे प्रफुल्ल लोढा यांच्यासह तिघांवर गुन्हा दाखल करण्यात आला आहे.
माजी नगराध्यक्ष पारस ललवाणी यांनी माजी मंत्री आ.गिरीष महाजन यांच्यावर गंभीर आरोप केल्यानंतर काही दिवसांनीच ललवाणी यांच्या विरोधात अल्पवयीन मुलीचा बळजबरीने विवाह लाऊन देण्यासह विनयभंग केल्याप्रकरणी ‘पोक्सो’ कायद्यांतर्गत गुन्हा दाखल झाला होता. ललवाणी यांच्याविरुद्ध श्रीरामपूर (जि.अहमदनगर) येथे गुन्हा दाखल झाला असून शून्य क्रमांकाने जामनेर पोलीस स्थानकात वर्ग करण्यात आला होता.
पारस ललवाणी यांच्याविरोधात दाखल केलेल्या गुन्ह्यात ते सांगतील त्याप्रमाणे न्यायालयात लिहून देण्यासाठी संबंधित महिलेने २५ लाखांची खंडणी मागितली होती. आपल्यावर गुन्हा दाखल करण्यासाठी कुणी प्रवृत्त केले याची माहिती घेतल्यानंतर ललवाणी यांनी महिलेला पोलिसांच्या जाळ्यात अडकविण्याचे ठरविले. बुधवारी लासलगाव पोलीस ठाण्याचे सहाय्यक निरीक्षक राहुल वाघ यांच्या मार्गदर्शनाखाली पोलीस उपनिरीक्षक कोथले व कर्मचाऱ्यांनी सापळा रचून महिलेला रंगेहाथ अटक केली.
२५ लाखांची मागितली खंडणी, तिघांवर गुन्हा
ललवाणी यांनी पोलिसांमार्फत सापळा रचला महिलेला देण्यासाठी २५ लाखांच्या बंडलाची बॅग रचण्यात आली त्यात कोऱ्या नोटांवर असली ५० हजारांच्या नोटा लावल्या होत्या. महिलेला रंगेहात पकडण्यात आले असून याप्रकरणी लासलगाव पोलिसात अलकेश झुंबरलाल ललवाणी यांच्या फिर्यादीवरून ज्योती चंदूलाल कोठारी, सुनील कोचर, प्रफुल्ल लोढा यांच्याविरुद्ध गुन्हा दाखल झाला आहे.
लासलगाव पोलीस स्थानकाचे प्रभारी अधिकारी राहुल वाघ यांनी ‘जळगाव लाईव्ह न्यूज’सोबत बोलतांना याबाबत माहिती दिली आहे.
