⁠ 
गुरूवार, मार्च 28, 2024

अर्थमंत्र्यांनी दिला कार खरेदीदारांना दणका! ‘ही’ वाहने केली महाग

जळगाव लाईव्ह न्यूज । २ फेब्रुवारी २०२३ । अर्थमंत्री निर्मला सीतारामन यांनी 2023-2024 या वर्षाचा अर्थसंकल्प सादर केला आहे. यादरम्यान आयकर ते कृषी आणि शिक्षण क्षेत्रात अनेक घोषणा करण्यात आल्या आहेत. अर्थमंत्र्यांनी ऑटोमोबाईल क्षेत्राशी संबंधित एक घोषणाही केली. त्याच्या या घोषणेमुळे अनेक कार ग्राहकांना धक्का बसू शकतो.

अर्थसंकल्पात, पूर्णपणे तयार स्थितीत म्हणजेच कम्प्लीटली बिल्ट युनिट (CBU) आयात केलेल्या कारवरील आयात शुल्क (कस्टम ड्यूटी) वाढवण्याचा प्रस्ताव देण्यात आला आहे. हे शुल्क इलेक्ट्रिक वाहनांनाही लागू होईल. एकूणच परदेशातून येणाऱ्या आलिशान गाड्या आता महाग होणार आहेत.

अर्थमंत्री निर्मला सीतारामन यांनी बुधवारी संसदेत अर्थसंकल्प सादर करताना ही घोषणा केली. त्यानुसार, $40,000 पेक्षा कमी किमतीच्या CBU वाहनांवरील आयात शुल्क 60 वरून 70 टक्के केले जाईल. 3,000 सीसीपेक्षा कमी इंजिन क्षमता असलेल्या पेट्रोलवर चालणाऱ्या वाहनांना आणि 2,500 सीसीपेक्षा कमी इंजिन क्षमता असलेल्या डिझेलवर चालणाऱ्या वाहनांनाही हा कर लागू होईल.

त्याचप्रमाणे परदेशात बनवल्या जाणाऱ्या इलेक्ट्रिक वाहनांवरील सीमाशुल्कही ६० टक्क्यांवरून ७० टक्के करण्यात आले आहे. परदेशातून अर्धवट अवस्थेत आयात केल्या जाणाऱ्या वाहनांवरील शुल्क ३० टक्क्यांवरून ३५ टक्के करण्याचा प्रस्ताव अर्थसंकल्पात ठेवण्यात आला आहे.

$40,000 पेक्षा जास्त किमतीच्या पूर्णपणे तयार केलेल्या कारच्या आयातीवर आधीच 100 टक्के शुल्क आकारले जाते. 3,000 सीसीपेक्षा जास्त क्षमतेच्या पेट्रोल वाहनांना आणि 2,500 सीसीपेक्षा जास्त क्षमतेच्या डिझेल वाहनांनाही हा शुल्क दर लागू आहे. रेटिंग एजन्सी ICRA चे वरिष्ठ उपाध्यक्ष समशेर दिवाण म्हणाले, “या बदलाचा फारसा परिणाम होण्याची शक्यता नाही. याचे कारण असे की, बहुतांश आलिशान गाड्या आता देशातच असेंबल झाल्या आहेत. या आयात शुल्क वाढीमुळे देशांतर्गत कार निर्मितीला आणखी प्रोत्साहन मिळेल.