जळगाव लाईव्ह न्यूज । १७ मार्च २०२१ । शहर मनपाच्या महापौरपदी शिवसेनेच्या जयश्री सुनील महाजन या विराजमान होणार असल्याचे जवळपास निश्चित झाले आहे. जयश्री महाजन यांनी उमेदवारी अर्ज दाखल केला असून ‘सौ.जयश्री सुनील महाजन, महापौर, जळगाव महानगरपालिका’ नावाने घराला लावण्याची आकर्षक नेम प्लेट देखील तयार करण्यात आली आहे.
जळगाव मनपातील राजकारण पूर्णतः ढवळून निघाले असून शिवसेनेने मनपावर भगवा फडकविण्याचे निश्चित केले आहे. भाजपातून फोडलेल्या नगरसेवकांच्या बळावर शिवसेनेकडून महापौर पदासाठी जयश्री सुनील महाजन तर उपमहापौर पदासाठी कुलभूषण पाटील यांनी अर्ज दाखल केला आहे. शिवसेनेकडून विजयाची जय्यत तयारी केली जात आहे. जळगाव शहरातील संजू आर्ट्सचे संचालक संजू चव्हाण यांनी भावी महापौर सौ.जयश्री महाजन यांना भेट देण्यासाठी एक आकर्षक नेम प्लेट देखील तयार केली आहे. जयश्री महाजन यांचा विजय निश्चित मानला जात असल्याने शिवसेनेत आनंदाचे वातावरण निर्माण झाले आहे.
