जळगाव लाईव्ह न्यूज । १३ मार्च २०२१ । धरणगाव येथील नामांकित वकिलाचा सकाळी क्रिकेट खेळत असताना हृदयविकाराच्या झटक्याने दुर्दैवी मृत्यू झाल्याची घटना आज घडली. ॲड. दिलीप रावतोळे असे मृत वकिलाचे नाव आहे.
ॲड. दिलीप रावतोळे हे शहरातील सर्व वकील मित्रांसोबत सकाळी महात्मा फुले हायस्कूलच्या मैदानावर क्रिकेट खेळायला जात असे. शनिवारीसुद्धा ते नेहमीप्रमाणे क्रिकेट खेळायला गेले होते. त्यामध्ये बॅटिंग करत असताना रावतोळे अचानक खाली कोसळले. त्यानंतर सर्व मित्रांनी त्यांना धरणगाव येथील ग्रामीण रुग्णालयात नेले. त्यानंतर रुग्णालयाचे वैद्यकीय अधीक्षक डॉ. गिरीश बोरसे यांनी ॲड. दिलीप रावतोळे यांना तपासले असता, हृदयविकाराचा तीव्र झटक्याने त्यांचा मृत्यू झाल्याचे त्यांनी सांगितले.
एलआयसीचे विमा विकास अधिकारी गणेश रावतोळे यांचे लहान बंधू व गुड शेपर्ड इंग्लिश मीडियम स्कूलच्या प्राचार्या चैताली रावतोळे यांचे ते पती होते. दिलीप रावतोळे यांच्या अचानक जाण्याने संपूर्ण धरणगाव शहरात हळहळ व्यक्त केली जात आहे. त्यांच्या पश्चात पत्नी, एक मुलगी व एक मुलगा, तीन भाऊ, दोन बहिणी असा परिवार आहे.
