जळगाव लाईव्ह न्यूज । ७ मे २०२३ । यंदा बदलत्या हवामानामुळे ऐन उन्हाळ्यात कडक उन्ह, मुसळधार पाऊस व गारपीट असा बदल दिसून आला. गेल्या महिन्याच्या एप्रिल महिन्यात अवकाळीच्या ढगांमुळे तापमानाचा पारा ४२.४ अंश सेल्सिअस पर्यंत राहिला. तर ३० पैकी नऊ दिवस पारा चाळिशी पार गेला. पण आता मे महिन्यात पंधरा दिवस तापमानाचा ४६ अंशांवर जाण्याची शक्यता आहे.
अरबी समुद्रात निर्माण झालेली दबावाची स्थिती आणि बाष्पयुक्त ढगांची निर्मिती या मुळे ही गेल्या एप्रिल महिन्यात गारपीट झाली.एप्रिल महिन्यात किमान तापमान हे १९ डिग्री सेल्सिअसपर्यंत आले तर कमाल तापमान हे ४२.४ डिग्रीपर्यंत पोहोचले.
सकाळी हिवाळा, दुपारी उन्हाळा आणि संध्याकाळ झाली की पावसाळा असे तीनही ऋतूंची अनुभूती देणारा एप्रिल महिना ठरला. दरम्यान, या तापमानाच्या चढ-उतारामुळे शेतकऱ्यांचे प्रचंड नुकसान झाले. १२ ते १७ आणि १९ ते २१ एप्रिल असे नऊ दिवस पारा चाळीशीपार गेला होता.
चक्रीवादळातून दिलासा
येत्या ७ ते ९ मे दरम्यान बंगालच्या उपसागरात ‘मोचा’ चक्रीवादळ निर्माण होण्याची शक्यता आहे. या स्थितीचा परिणाम महाराष्ट्राच्या किनारपट्टी लगत होऊ शकतो. मात्र, जळगाव जिल्ह्यावर त्याचा परिणाम हाेणार नाही असा अंदाज आहे.
