जळगाव लाईव्ह न्यूज । ७ जुलै २०२२ । खासगी क्षेत्रातील सर्वात मोठी बँक एचडीएफसी बँकेच्या करोडो ग्राहकांसाठी एक वाईट बातमी आहे. ती म्हणजे HDFC बँकेने वेगवेगळ्या मुदतीच्या सर्व प्रकारच्या कर्जांसाठी MCLR वाढवला आहे. बँकेने त्यात 20 बेसिस पॉइंट्सने वाढ केली आहे. बँकेने उचललेल्या या पावलानंतर ज्या ग्राहकांनी एचडीएफसीकडून गृहकर्ज, कार लोन आणि वैयक्तिक कर्ज घेतले आहे, त्यांचा ईएमआयचा बोजा आणखी वाढणार आहे.
आजपासून नवीन दर लागू
बँकेने नवीन दर 7 जुलैपासून तत्काळ लागू केले आहेत. बँकेच्या वेबसाइटवर दिलेल्या माहितीनुसार, एका रात्रीचा MCLR चा दर 20 बेस पॉइंट्सने वाढवून 7.70 टक्के करण्यात आला आहे. त्याचप्रमाणे, एक महिन्याच्या कालावधीसाठी एमसीएलआरचा दर 7.75 टक्के, 3 महिन्यांच्या कालावधीसाठी एमसीएलआरचा दर 7.80 टक्के आणि सहा महिन्यांसाठी एमसीएलआरचा दर 7.90 टक्के झाला आहे. त्याचप्रमाणे, एक वर्षाचा MCLR 8.05 टक्के करण्यात आला आहे.
गेल्या महिन्यात 35 बेसिस पॉइंट्स वाढवले
एचडीएफसी बँकेने गेल्या महिन्यातच 35 बेसिस पॉइंट्सने दर वाढवले आहेत. जे 7 जूनपासून लागू करण्यात आले. एचडीएफसीने महिन्याभरात दुसऱ्यांदा दरात बदल केला आहे. आरबीआयने रेपो दर आणि रिव्हर्स रेपो दरात वाढ केल्यानंतर विविध बँकांची कर्जे महाग झाली आहेत. RBI गव्हर्नर शक्तीकांत दास यांनी 8 जून रोजी रेपो दरात 50 बेसिस पॉईंटची वाढ केली होती. याच्या काही दिवसांपूर्वी अचानक त्यात 40 बेसिस पॉइंट्सने वाढ करण्यात आली होती. त्यानुसार गेल्या महिनाभरात त्यात ९० पैशांची वाढ झाली आहे.
बँकेचे नेटवर्क दुप्पट होईल
यापूर्वी 22 जून रोजी बँकेने देशभरातील विद्यमान शाखा दुप्पट करण्याची योजना जाहीर केली होती. दरवर्षी सुमारे 1,500 ते 2,000 शाखा उघडल्या जातील, असे बँकेकडून सांगण्यात आले. त्यामुळे येत्या तीन ते पाच वर्षांत बँकेचे जाळे दुप्पट होणार आहे. सध्या बँकेच्या देशभरात 6,000 पेक्षा जास्त शाखा आहेत. बँकेच्या अधिकाऱ्याच्या वतीने असे सांगण्यात आले की, लोकसंख्येनुसार बँकेच्या शाखांची संख्या ऑर्गनायझेशन फॉर इकॉनॉमिक कोऑपरेशन अँड डेव्हलपमेंट (OECD) देशांपेक्षा कमी आहे.