जळगाव लाईव्ह न्यूज । ३ फेब्रुवारी २०२३ । या अर्थसंकल्पात सरकारने रेल्वेसाठी विक्रमी तरतूद केली आहे. अर्थमंत्र्यांच्या या घोषणेनंतर देशभरात नवीन रेल्वे मार्गांच्या विस्ताराचे काम केले जाणार आहे. अर्थसंकल्पात तरतूद केल्यानंतर दररोज 12 किलोमीटरहून अधिक ट्रॅक टाकण्याचे काम केले जाणार आहे. रेल्वेच्या जाळ्याच्या विस्ताराचा थेट फायदा करोडो प्रवाशांना होणार आहे. हे काम पूर्ण झाल्यानंतर देशातील गाड्यांची संख्या वाढेल आणि गाड्या एका ठिकाणाहून दुसऱ्या ठिकाणी सुसाट वेगाने जाऊ शकतील.
75,000 कोटी रुपयांचा निधी जाहीर केला
केंद्रीय रेल्वे मंत्री अश्वनी वैष्णव म्हणाले की, रेल्वेच्या नवीन योजनांसाठी अर्थसंकल्पात 75,000 कोटी रुपयांच्या निधीची घोषणा करण्यात आली आहे. केंद्र सरकारने रेल्वेसाठी 2.4 लाख कोटींचा अर्थसंकल्प दिला आहे. त्यामुळे गेल्या अनेक वर्षांपासून रेल्वेमध्ये गुंतवणुकीतील जी कमतरता भासत होती, तीही भरून निघणार आहे. अर्थसंकल्पात हरित विकास, पर्यटन क्षेत्रावर भर दिला जाणार आहे. सेमी हायस्पीड गाड्यांची संख्या वाढवणे, रेल्वे लाईन टाकण्याचे कामही सुरू आहे.
183 नवीन लाईनचे काम सुरू आहे
रेल्वे नेटवर्कशी जोडण्यासाठी 183 नवीन मार्गांवर काम सुरू आहे. अनेक ठिकाणी सिंगल लाईनचे दुहेरीकरण आणि अनेक ठिकाणी गेज परिवर्तन करण्यात येत आहे. त्यामुळे प्रवाशांसाठी रेल्वे प्रवास सोयीचा होणार आहे. पहिल्या दिवशी फक्त 4 किमी ट्रॅक टाकण्याचे काम झाल्याचे त्यांनी सांगितले. आता दररोज 12 किलोमीटरहून अधिक ट्रॅक टाकण्याचे काम केले जाणार आहे.
यापूर्वी, रेल्वेमंत्र्यांनी संसदेत दिलेल्या माहितीनुसार, देशभरात सुमारे 49,323 किमी लांबीच्या 452 प्रकल्पांवर काम सुरू आहे. त्यांची अंदाजे किंमत 7.33 लाख कोटी आहे. यातील काही योजना सुरू आहेत, काही मंजूर झाल्या आहेत तर काही प्रगतीपथावर आहेत. यासोबतच 183 नवीन रेल्वे लाईन बांधण्यात येत आहेत. गेज रूपांतरण 42 लाईनवर आणि 227 लाईनचे दुहेरीकरण केले जात आहे.
माहितीनुसार मध्य रेल्वे-14, पूर्व रेल्वे-12, पूर्व किनारपट्टी रेल्वे- 8, पूर्व मध्य रेल्वे-25, उत्तर मध्य रेल्वे- 1, ईशान्य रेल्वे-10, ईशान्य फ्रंटियर रेल्वे- 20, उत्तर रेल्वे- 18, उत्तर पश्चिम रेल्वे – 8, दक्षिण मध्य रेल्वे – 15, दक्षिण पूर्व मध्य रेल्वे – 9, दक्षिण पूर्व – 7, दक्षिण रेल्वे – 11, दक्षिण पश्चिम रेल्वे – 18, पश्चिम मध्य रेल्वे – 3 आणि पश्चिम रेल्वे – 4 मार्ग.