जळगाव लाईव्ह न्यूज । २७ मे २०२२ । मान्सून कालावधीत विशेषत: जून व जुलै या महिन्यात विज पडून जिवीत हानी होत असते. विज पडून जिवीत हानी होऊ नये या करिता प्रतिबंधात्मक उपाययोजन म्हणून पृथ्वी मंत्रालय भारत सरकार नवी दिल्ली यांनी ‘दामिनी’ ॲप तयार करण्यात आले असून सदरचे ॲप गुगल प्ले स्टोअर वर उपलब्ध असल्याचे जिल्हा प्रशासनाने कळविले आहे.
सुरक्षात्मक उपाययोजना म्हणून आपले अधिनस्त तालुक्यातील सर्व शासकीय यंत्रणा, शासकीय अधिकारी, कर्मचारी, नागरिक, क्षेत्रीय अधिकारी, मंडळ अधिकारी, अव्वल कारकून, महसूल सहाय्यक, गाव स्तरावील सरपंच, पोलिस पाटील, तलाठी, ग्रामसेवा, कृषीसेवक, कोतवाल, आशा वर्कर, अंगणवाडी सेविका, आरोग्य सेवक, ग्रामपंयाचत डाटा एन्ट्री ऑपरेटर यांना सदरचे ॲप डाऊनलोड करुन त्याचा वापर करणेबाबत प्रवृत्त करण्यात यावे तसेच सदरचे ॲप जीपीएस लोकेशन ने काम करीत असून विज पडण्याच्या 15 मिनिटापूवी सदरच्या ॲपमध्ये स्थिती दर्शविण्यात येते.
गावातील सर्व स्थानिक शासकीय अधिकारी , कर्मचारी यांना सदर ॲप डाऊनलोड करुन त्यामध्ये प्रापत होणाऱ्या अलर्ट नुसार आवश्यक पूर्वसूचना गावातील सर्व नागरिकांना देऊन होणारी जिवितहानी टाळण्याच्या अनुषंगाने कार्यवाही करण्यास जिल्हाधिकारी तथा अध्यक्ष जिल्हा आपत्ती व्यवस्थापन प्राधिकरणाचे अध्यक्ष अभिजीत राऊत यांनी कळविले आहे.
दामिनी अ‍ॅप काय आणि कसे काम करते?
दामिनी अ‍ॅप विजा, गडगडाट, गडगडाट इत्यादीच्या शक्यतेची अचूक माहिती १५ मिनिटांपूर्वी देते. यासाठी, उष्णकटिबंधीय हवामानशास्त्राच्या शास्त्रज्ञांनी देशभरात सुमारे 48 सेन्सर्ससह लाइटनिंग लोकेशन नेटवर्क स्थापित केले आहे. या नेटवर्कच्या आधारे, दामिनी अ‍ॅप विकसित केले गेले आहे, जे 40 किमीच्या परिघात विजेच्या संभाव्य स्थानाची माहिती देते. रिपोर्ट्सनुसार, हे नेटवर्क विजेचा अचूक अंदाज देते. विजेच्या गडगडाटासह ते मेघगर्जनेचा वेगही सांगते.
चेतावणी मिळाल्यावर काय करावे?
तुमच्या परिसरात वीज कोसळल्यास दामिनी अ‍ॅप तुम्हाला आगाऊ चेतावणी देईल. अशा परिस्थितीत वीज पडू नये म्हणून मोकळ्या मैदानात, झाडांखाली, डोंगराळ भागात, खडकांवर थांबू नका. धातूची भांडी धुणे टाळा आणि आंघोळ अजिबात टाळा. पाऊस टाळा आणि जमिनीवर जिथे पाणी साचते तिथे उभे राहू नका. छत्री कधीही वापरू नका. इलेक्ट्रिकल हाय-टेन्शन वायर आणि टॉवर्सपासून दूर राहा. घराच्या आत जा. जर तुम्ही बाहेर कुठे असाल आणि घरी जाणे शक्य नसेल तर कान बंद करून मोकळ्या जागी गुडघ्यावर बसा. धोका संपल्यावर घरी जा.