जळगाव लाईव्ह न्यूज । ३० मार्च २०२१ । महावितरण अधिक्षक अभियंत्यांना खूर्चीत बांधून मारहाण केल्याच्या आरोपाखाली अटकेत असलेले चाळीसगावचे आमदार मंगेश चव्हाण यांच्यासह ३१ जणांची आज नाशिक कारागृहात रवानगी केली आहे.

काय आहे प्रकरण?

शुक्रवारी २६ मार्च रोजी महावितरणच्या कार्यालयात आमदार चव्हाण यांच्यासह सुमारे ४० ते ५० जणांना जमाव गेला होता. यावेळी आमदारांसह जमावातील शेतकऱ्यांनी फारुख यांना दोरीने खुर्चीत बांधुन मारहाण केली. चपलांचा हार घातला. या प्रकरणी फारुख यांनी दिलेल्या फिर्यादीवरुन शुक्रवारी रात्री आमदार चव्हाण यांच्यासह ४० ते ५० जणांवर एमआयडीसी पोलिस ठाण्यात गुन्हा दाखल करण्यात येऊन चव्हाणांसह ३१ जणांना अटक केली हीती. अटकेतील सर्व संशयितांच्या पोलिस कोठडीची मुदत मंगळवारी संपली. यामुळे त्यांना जिल्हा न्यायालयात हजर करण्यात आले. यावेळी पोलिसांकडून सर्व संशयितांच्या न्यायालयीन कोठडीची मागणी करण्यात आली होती. सुनावणीअंती न्यायालयाने सर्वांना न्यायालयीन कोठडी दिली.

जिल्हा कारागृहात क्षमतेपेक्षा जास्त कैदी असल्यामुळे आणखी ३१ जणांना ठेऊन घेणे गैरसोयीचे होणार होते. त्यामुळे आमदार चव्हाण यांच्यासह सर्व ३१ संशयितांना नाशिक कारागृहात हलवण्यात आले.न्यायालयीन कोठडीत रवानगी झाल्यानंतर आमदार चव्हाण यांच्यासह सर्व संशयितांतर्फे एकत्र जामीन अर्ज न्यायालयात दाखल करण्यात आला आहे.

जळगाव लाईव्ह न्यूज । ३० मार्च २०२१ । शहरातील फळ गल्ली परिसरात लॉकडाऊनचे चित्रीकरण करणाऱ्या न्यूज पोर्टलच्या पत्रकाराचा मोबाईल आणि कॅमेरा घेऊन दुचाकीस्वार तिघांनी पळ काढल्याची घटना सोमवारी दुपारी घडली होती. एलसीबीच्या पथकाने एकाला मध्यरात्री अटक केली असून त्याच्याकडून मोबाईल हस्तगत करण्यात आला आहे.

शेरा चौकातील रहिवासी पत्रकार अल्ताफ इस्माईल शेख वय-३० वर्षे हे दि.२९ रोजी दुपारी ४.१५ च्या सुमारास ते पत्रकार तन्वीर पिंजारी यांच्यासह साने गुरुजी चौकातील फळ गल्लीत लॉकडाऊनबाबत आढाव्याचे मोबाईलने चित्रीकरण करीत होते. काळ्या रंगाच्या दुचाकीवर आलेल्या तिघांनी अल्ताफच्या हातातील मोबाईल आणि कॅमेरा हिसकावून टॉवर चौकाकडे पळ काढला. होता. याप्रकरणी शहर पोलिसात गुन्हा दाखल झाल्यानंतर पोलिसांनी तपासचक्रे फिरवली.

एलसीबीचे निरीक्षक किरणकुमार बकाले यांच्या पथकातील हवालदार विजयसिंग पाटील, सुधाकर अंभोरे, प्रितम पाटील, नितीन बाविस्कर, जितेंद्र पाटील, राहुल पाटील, नंदलाल पाटील, भगवान पाटील यांनी गुप्त माहिती काढली असता आकाश उर्फ नाकतोडा संजय मराठे वय-२१ रा.चौघुले प्लॉट याचे नाव समोर आले. पथकाने त्याला ताब्यात घेतले असता त्याच्याजवळ गुन्ह्यात वापरलेली दुचाकी आणि मोबाईल मिळून आला.

कल्पेश उर्फ बाळू देविदास शिंपी आणि एका अल्पवयीन मित्राच्या मदतीने ओळखीचा मित्र विक्रम भाटी याच्याकडून खाजगी कारण सांगत मागून आणलेल्या दुचाकीवर चोरली असल्याची त्याने कबुली दिली आहे. एलसीबीच्या पथकाने आकाशला शहर पोलिसांच्या स्वाधीन केले असून इतर दोघांचा शोध सुरू आहे.

जळगाव लाईव्ह न्यूज । ३० मार्च २०२१ । शेतात दादर कापणीसाठी गेलेल्या आव्हाने येथील ३० वर्षीय शेत मजुरावर रानडुकराने हल्ला केला. त्यात त्यांचा मृत्यू झाला आहे. कैलास उत्तम नाईक (वय-३०) असे मृत शेतमजुराचे नाव आहे.  ही घटना आज मंगळवारी सकाळी ११ वाजेच्या सुमरास घडलीय.

कैलास नाईकहा तरूण शेतकरी आज मंगळवार ३० मार्च रेाजी आपल्या कुटुंबियासह शेतात दादर कापणीसाठी गेले होते. सकाळी ११ वाजता आई वडील पत्नीसह काही मजूरांसक दादर कापत असतांना शेताच्या बांधावर लपलेल्या मोठ्या रानडुकराने अचानक केलेल्या हल्ल्यात कैलास गंभीर जखमी झाला.

तातडीने त्याला जिल्हा रूग्णलयात नेत असतांना आव्हाणे फाट्याजवळ त्याचा मृत्यू झाला. या घटनेमुळे आव्हाने शिवारातील शेतकरी भयभित झाले आहे. जिल्हा वैद्यकीय महाविद्यालयात मृतदेह नेण्यात आला आहे. याप्रकरणी अद्याप पोलीसात कोणतीही नोंद करण्यात आलेली नाही. मयताच्या पश्चात पत्नी वंदना, आई, वडील उत्तम नाईक आणि तीन अपत्ये (दोन मुली व एक मुलगा) असा परिवार आहे.

जळगाव लाईव्ह न्यूज । ३० मार्च २०२१ । शहरात चोरीच्या घटना दिवसेंदिवस वाढतच आहे.  शहरातील सिंधी कॉलनी परिसरातील जोशी कॉलनीत मध्यरात्री वृध्देच्या गळ्यातील दीड तोळ्याची सोन्याची पोत आणि साडेबारा हजाराची रोकड अज्ञात चोरट्यांनी लंपास केल्याची घटना आज मंगळवार ३० मार्च रोजी सकाळी उघडकीला आली. याप्रकरणी एमआयडीसी पोलीसात गुन्हा नोंदविण्याचे काम सुरू होते.

प्रकाश छबीदास भावसार (वय ६२ रा. जोशी कॉलनी, सिंधी कॉलनीजवळ जळगाव), यांची घरासमोर दुधाची डेअरी आहे. २९ मार्च रोजी घरात पत्नी व आईसह जेवण करून ते रात्री ११ वाजता झोपले. प्रकाश भावसार यांची आई इंदूबाई भावसार ह्या घराच्या वरच्या खोलीत एकट्या झोपतात.

मध्यरात्री सर्वजण गाढ झोपेत असतांना अज्ञात चोरट्याने वरच्या घरात प्रवेश करून इंदूबाई यांच्या गळ्यातील दीड तोळ्याची सोन्याची मंगलपोत आणि साडेबारा हजार रूपयांची रोकड असा एकुण अंदाजे ७० हजार रूपयांचा मुद्देमाला चोरून नेला. हा प्रकार आज मंगळवार ३० मार्च रोजी सकाळी उघडकीला आला.

चोरट्याने घरातील कपाटातील सामान अस्तव्यस्त केले होते. प्रकाश भावसार यांनी एमआयडीसी पोलीसात चोरी झाल्याची तक्रार दाखल केली आहे. शेवटचे वृत्त हाती आले तेव्हा गुन्हा दाखल करण्याचे काम सुरू होते.