जळगाव लाईव्ह न्यूज । १७ मार्च २०२१ । शहरातील इच्छादेवी चौकात असलेल्या स्वामी टॉवरमध्ये राहत असलेले बांधकाम व्यवसायिक खुबचंद साहित्या यांच्या भावाकडे सायंकाळी दरोड्याचा प्रयत्न झाला आहे. दरम्यान, दरोडेखोरांनी तलवार आणि बंदुकीचा धाक दाखविल्याची माहिती समोर येत आहे.
जळगावातील बांधकाम व्यावसायिक खूबचंद साहित्या यांचे भाऊ सतिष प्रेमचंद साहित्या हे इच्छादेवी चौकातील स्वामी टॉवरमध्ये राहतात. सायंकाळी ७.२० वाजता मास्क आणि रुमाल घातलेले चार तरुण त्यांच्या घरात घुसले. घरातील मुलांना धाक दाखवीत दरोड्याचा प्रयत्न केला. दरोडेखोरांनी मोबाईल हिसकावत काढता पाया घेतला मात्र बाहेर जाताना तो मोबाईल देखील फेकून दिल्याचे समजते. दरम्यान, घटनास्थळी पोलिसांचा ताफा हजर झाला असून तपास सुरू आहे. पोलिसांनी काही सीसीटीव्ही फुटेज देखील ताब्यात घेतल्याचे कळते.
