जळगाव लाईव्ह न्यूज । ६ मार्च २०२१ । आशादीप वसतिगृहातील प्रकरण संपूर्ण महाराष्ट्रभर गाजत आहे. या प्रकरणात काही तथ्य नसल्याचे चौकशीतून समोर आले असले तरी हे प्रकरण मात्र शांत होण्याचे नाव घेत नाहीये. यात आता भर म्हणून तक्रार करणाऱ्या ‘त्या’ युवतीने ‘रुग्णालयात दाखल केले तर जीवाचे बरे वाईट करून घेईन’ अशी धमकी दिली आहे.
याबाबत सविस्तर माहिती अशी कि, सदर तरुणीला रुग्णालयात दाखल करण्यासाठी आणले असताना तिने फार गोंधळ घालत रुग्णालयात दाखल होण्यास नकार दिला. तसेच यावेळी तिने पोलिसांना धमकी देत सांगितले कि, जर मला रुग्णालयात दाखल केले तर मी जीवाचे बरे वाईट करून घेईल. त्यामुळे तिला पुन्हा वसतिगृहात नेण्यात आले.
तिची मानसिक स्थिती ठिक नसून तिला डॉक्टरांच्या निगरानीत ठेवण्याची आवश्यकता असल्याचे समितीने सादर केलेल्या प्राथमिक अहवालात नमूद केले आहे. त्या अनुषंगाने तिला शासकीय वैद्यकीय महाविद्यालय व रुग्णालयात दाखल करण्याबाबत वसतीगृह प्रशासनाने अधिष्ठातांना पत्र दिले होते. त्यानंतर तिला रुग्णालयात दाखल करण्यासाठी आणले होते.