जळगाव लाईव्ह न्यूज । तुषार देशमुख । चाळीसगावात क्लास संपल्यानंतर स्कुटीने घरी जात असताना एक 15 वर्षीय अल्पवयीन मुलीला भरधाव ट्रकने जोरदार धडक दिल्याने झालेल्या भीषण अपघातामध्ये मुलगी ठार झाल्याची धक्कादायक घटना शुक्रवार रोजी सायंकाळी 7 वाजता धुळे रोडवरील महामार्गावर घडली. चाळीसगाव शहर पोलीस ठाण्यात अकस्मात मृत्यूची नोंद करण्यात आली आहे.
सायली भागवत हडपे (वय १५, रा. शिवदर्शन कॉलनी चाळीसगाव) असे मृत मुलीचे नाव आहे. ही मुलगी शुक्रवार रोजी सायंकाळी सात वाजताच्या सुमारास क्लास संपल्यानंतर आपल्या स्कुटीने घरी जात होती. तेव्हा अचानक मागून भरधाव वेगाने धुळ्याकडे जाणाऱ्या ट्रकने (क्र.एम एच -46 एफ-३२३२) जोरदार धडक दिल्याने या भीषण अपघातात सायली भागवत हडपे या मुलीचे उजवा हात व उजवा पाय ट्रकच्या पुढील चाकाखाली दाबले गेले. त्यामुळे तिला गंभीर दुखापत झाली.
चाळीसगावातील दवाखान्यांमध्ये या मुलीला उपचारासाठी नेण्यात आले असता पुढील उपचारासाठी नाशिक येथे हलवण्यासाठी डॉक्टरांनी सांगितले मात्र तिची नाशिकला नेत असतानाच रस्त्यामध्ये प्राणज्योत मालवली. पोलिसांनी घटनास्थळी धाव घेऊन पंचनामा केला. व अपघातग्रस्त वाहनाला पोलिसांनी ताब्यात घेतले आहे. वैद्यकीय अधिकारी यांच्या खबरीवरून चाळीसगाव शहर पोलीस ठाण्यात अकस्मात मृत्यूची नोंद करण्यात आली आहे. पुढील तपास पोलीस निरीक्षक के के पाटील यांच्या आदेशानुसार किशोर सोनवणे हे करीत आहेत.
