१ जुलैपासून होणार आहेत ‘हे’ मोठे बदल! त्याचा थेट परिणाम तुमच्या खिशावर होईल

जळगाव लाईव्ह न्यूज । २७ जून २०२३ । जून महिना संपत आला आहे आणि तीन दिवसांनंतर 1 जुलै आहे. जुलै महिन्याच्या सुरुवातीला तुमच्याशी संबंधित अनेक गोष्टी बदलण्याची शक्यता आहे. या गोष्टींचा थेट परिणाम तुमच्या खिशावर होणार आहे. दर महिन्याच्या पहिल्या तारखेबरोबरच यावेळीही काही बदल अपेक्षित आहेत. तुम्हाला या बदलांची जाणीव असणे आवश्यक आहे. या बदलांमध्ये एलपीजी सिलिंडरचे दर ते सीएनजी-पीएनजीच्या किमतींचा समावेश आहे. १ जुलैपासून होणाऱ्या बदलांबद्दल जाणून घेऊया-

गॅस सिलेंडरचे दर
तेल विपणन कंपन्या दर महिन्याच्या पहिल्या दिवशी गॅस सिलिंडरच्या किमतीत बदल करतात. एप्रिल, मे आणि जूनच्या पहिल्या तारखेला व्यावसायिक सिलिंडरच्या किमतीत कपात करण्यात आली होती. मात्र गेल्या काही महिन्यांपासून घरगुती सिलिंडरच्या दरात कोणताही बदल झालेला नाही. यावेळी व्यावसायिक सोबतच 14 किलो एलपीजी सिलिंडरचे दरही कमी होण्याची शक्यता आहे.

CNG-PNG किमती
सीएनजी आणि पीएनजीच्या किंमतीतील बदल महिन्याच्या 1 तारखेला किंवा एलपीजीप्रमाणे पहिल्या आठवड्यात दिसून येतात. दिल्ली, मुंबई आणि इतर शहरातील तेल कंपन्या महिन्याच्या पहिल्या आठवड्यातच सीएनजी-पीएनजीचे दर बदलतात. अशा स्थितीत जुलैमध्ये किमतीत बदल होण्याची शक्यता आहे.

क्रेडिट कार्ड अटी
1 जुलै 2023 पासून परदेशात क्रेडिट कार्डच्या खर्चावर TCS शुल्क आकारण्याची तरतूद असू शकते. या अंतर्गत, जर तुमचा खर्च 7 लाख किंवा त्याहून अधिक असेल तर तुम्हाला 20 टक्के TCS भरावा लागेल. शिक्षण आणि औषधोपचाराशी संबंधित खर्चावर ही फी 5 टक्के करण्यात येणार आहे. परदेशात शिक्षणासाठी कर्ज घेतलेल्या करदात्यांना ७ लाखांपेक्षा जास्त रकमेवर ०.५ टक्के टीसीएस फी भरावी लागेल.