जळगाव लाईव्ह न्यूज । २४ सप्टेबर २०२१ । सध्याच्या दिवसात बचतीचं महत्त्व सर्वांनाच पटलं आहे. त्यात बचत करून गुंतवलेल्या पैशांवर प्रचंड नफा मिळावा आणि पैसे न गमावण्याची हमी मिळावी. या दोन्ही गोष्टी फक्त पोस्ट ऑफिस योजनांमध्ये गुंतवणूक करून मिळू शकतात. पोस्ट ऑफिसची पब्लिक प्रॉव्हिडंट फंड (पीपीएफ) ही योजना तुम्ही पोस्ट खात्याच्या मार्फत सुरू करू शकता. यात तुम्हाला दररोज 150 रुपयांची बचत करून 20 वर्षांनंतर 20 लाख रुपयांहून अधिकचा फंड मिळू शकतो.
गेल्या काही वर्षांपासून भारतीय डाक ग्राहकांसाठी वेगवेगळ्या योजना राबवत आहे. ज्येष्ठ नागरिकांसह तरूणांनाही या योजनांचा फायदा घेता येऊ शकतो. भारतीय डाकच्या योजनांचा लाभ घेणाऱ्यांची संख्या वाढू लागली आहे. तज्ज्ञांचं म्हणणं आहे की, जर तुम्ही दैनंदिन खर्चातून काही अनावश्यक खर्च थांबवले, तर १५० रुपये वाचवू शकता. त्याचबरोबर जर तुम्ही हा पैसा सरकारच्या छोट्या बचत योजनांमध्ये टाकला, तर त्याचा मोठा फायदा मिळू शकतो.
कसे मिळतील २० लाख रुपये?
जर तुम्ही २५ वर्षांचे असाल, तर छोट्या रकमेत मोठा परतावा मिळवण्याची ही सर्वोत्तम संधी आहे. तज्ज्ञांचे म्हणणे आहे की, जर तुमचे ३०-३५ हजार रुपयांपर्यंत उत्पन्न असेल, तर इतर कोणत्याही बचतीव्यतिरिक्त, सुरुवातीला दररोज १५० रुपये वाचवू शकता. ही बचत तुम्हाला वयाच्या ४५ व्या वर्षी २० लाख रुपयांपेक्षा जास्त निधी मिळवून देऊ शकते. जेणेकरून तुम्ही काम करताना तुमच्या मोठ्या गरजा सहज पूर्ण करू शकाल.
– जर तुम्ही दररोज १५० रुपये वाचवण्याच्या उद्देशाने पीपीएफ मध्ये गुंतवणूक सुरू केली, तर दरमहा तुम्ही ४५०० रुपयांची गुंतवणूक करू शकता. जर तुम्ही दरमहा ४५०० रुपये गुंतवले, तर वार्षिक गुंतवणूक ५४ हजार रुपये असेल.
– याच हिशोबाने २० वर्षांत एकूण गुंतवणूक १०.८० लाख रुपये होईल. ७.१ टक्के वार्षिक चक्रवाढीच्या दृष्टीने, तुम्हाला २० वर्षांत २० लाख रुपयांपेक्षा जास्त तयार निधी मिळेल.
पीपीएफ खात्याचे फायदे : –
– हे खाते फक्त १०० रुपयांनी उघडता येते. तसेच तुम्ही संयुक्त खाते म्हणजे जॉईंट अकाउंटही उघडू शकता.
– खाते उघडण्याच्या वेळी तुम्हाला नामांकन सुविधाही उपलब्ध करून देण्यात आली आहे. पंधरा वर्षांचा मॅच्युरिटी पीरियड पूर्ण झाल्यानंतरही तो ५ वर्षांसाठी २ वेळा वाढवता येतो.
– यातून मिळणारे उत्पन्न करमुक्त आहे. तिसऱ्या आर्थिक वर्षापासून खात्यावर कर्जही घेतले जाऊ शकते. बँका, पोस्ट ऑफिस तुम्हाला पीपीएफ खाते उघडण्याची परवानगी देतात. हे खाते १५ वर्षांसाठी उघडता येते, जे आणखी ५ वर्षांसाठी वाढवता येते.
– सध्या, पीपीएफवरील व्याज दर ७.१ टक्के आहे, जो दरवर्षी चक्रवाढ केला जातो. कमीत कमी १०० रुपये भरून पीपीएफमध्ये खाते उघडता येते. एका खात्यात किमान ५०० रुपये गुंतवणे आवश्यक आहे, तसेच तुम्ही एका वर्षात खात्यात जास्तीत जास्त १.५ लाख रुपये गुंतवू शकता.
या योजनेच्या अधिक माहितीसाठी पोस्ट ऑफिसमध्ये संपर्क साधावा
