जळगाव लाईव्ह न्यूज । अजित पवार गटाच्या नेत्यांनी दिल्लीत केंद्रीय गृहमंत्री अमित शहा यांची भेट घेतल्यानंतर महाराष्ट्रातील राजकीय घडामोडींना वेग आला आहे. राष्ट्रवादी काँग्रेसच्या कोअर कमिटीची बैठक होण्यापूर्वी मंत्री छगन भुजबळ यांच्या निवासस्थानी पक्षाच्या प्रमुख नेत्यांची बैठक सुरू झाली आहे. दुसरीकडे, माजी मंत्री अनिल पाटील यांना तातडीने मुंबईत बोलावण्यात आल्याने त्यांच्या राजकीय कमबॅकच्या चर्चांना उधाण आले आहे.
भुजबळांच्या निवासस्थानी राष्ट्रवादीच्या नेत्यांची बैठक
अमित शहा यांच्या भेटीनंतर राष्ट्रवादी काँग्रेसच्या गोटात महत्त्वाच्या घडामोडी सुरू झाल्या आहेत. छगन भुजबळ यांच्या निवासस्थानी होत असलेल्या बैठकीला प्रफुल्ल पटेल, सुनील तटकरे आणि हसन मुश्रीफ यांच्यासह पक्षाचे प्रमुख नेते उपस्थित आहेत. या बैठकीनंतर राष्ट्रवादीच्या कोअर कमिटीची बैठक होणार असल्याची माहिती आहे. या घडामोडींच्या पार्श्वभूमीवर राज्यातील मंत्रिमंडळ फेरबदल आणि पक्षातील नव्या नियुक्त्यांबाबत चर्चा सुरू झाली आहे. माजी मंत्री अनिल पाटील यांनाही तातडीने मुंबईत बोलावण्यात आल्याने त्यांच्या मंत्रिमंडळातील पुनरागमनाबाबत राजकीय वर्तुळात तर्कवितर्क लढवले जात आहेत.
मंत्रिमंडळातील कमबॅकबाबत अनिल पाटील काय म्हणाले?
मुंबईला रवाना होण्यापूर्वी अनिल पाटील यांनी मंत्रिमंडळ फेरबदलाबाबत थेट भाष्य करणे टाळले. जिल्हा बँकेच्या निवडणुकीच्या संदर्भात उपमुख्यमंत्री सुनेत्रा पवार आणि राष्ट्रवादीचे प्रदेशाध्यक्ष सुनील तटकरे यांची भेट घेण्यासाठी आपण जात असल्याचे त्यांनी स्पष्ट केले.
मंत्रिमंडळातील संभाव्य फेरबदलाबाबत बोलताना पाटील म्हणाले की, मंत्रिमंडळात कोणाला संधी द्यायची, याबाबत संबंधित पक्षांचे वरिष्ठ नेते निर्णय घेत असतात. अमित शहा यांच्याकडे मंत्र्यांच्या कमबॅकसंदर्भात चर्चा होत असेल, असे आपल्याला वाटत नसल्याचेही त्यांनी सांगितले.
अजित पवार यांनी अडीच वर्षांनंतर मंत्रिमंडळात फेरबदल करून नवीन चेहऱ्यांना संधी देण्याचा शब्द दिला होता. हा शब्द पूर्ण करायचा असल्यास राष्ट्रवादीच्या राष्ट्रीय अध्यक्ष सुनेत्रा पवार यांच्या नेतृत्वाखालीच त्याबाबत निर्णय होऊ शकतो, असे अनिल पाटील यांनी स्पष्ट केले.
अमित शहा यांची भेट, राष्ट्रवादीच्या वरिष्ठ नेत्यांची बैठक आणि अनिल पाटील यांना मुंबईतून आलेले तातडीचे बोलावणे या घडामोडींमुळे मंत्रिमंडळ फेरबदलाच्या चर्चांना पुन्हा जोर आला आहे. मात्र, अनिल पाटील यांच्या मंत्रिमंडळातील पुनरागमनाबाबत अद्याप कोणतीही अधिकृत घोषणा झालेली नाही. त्यामुळे राष्ट्रवादीच्या आगामी बैठकीत कोणते निर्णय होतात आणि मंत्रिमंडळातील संभाव्य बदलांबाबत पक्षश्रेष्ठी काय भूमिका घेतात, याकडे राजकीय वर्तुळाचे लक्ष लागले आहे.
