जळगाव लाईव्ह न्यूज । १ जून २०२२ । आजपासून जून महिन्याला सुरुवात झाली आहे. आजपासून अनेक मोठे बदल झाले असून या बदलांचा परिणाम तुमच्या खिशावर होणार आहे. आजपासून रेशनपासून गॅस सिलिंडरपर्यंत आणि विम्यापासून गृहकर्जापर्यंत सर्व काही बदलेल. अशा परिस्थितीत, या बदलांबद्दल जागरूक असणे आपल्यासाठी महत्वाचे आहे.
व्यावसायिक सिलिंडरच्या दरात कपात
तेल कंपन्यांनी व्यावसायिक एलपीजी सिलिंडरचे दर कमी केले आहेत. इंडियन ऑइलने 1 जून रोजी जाहीर केलेल्या किमतीनुसार, व्यावसायिक सिलिंडरची किंमत 135 रुपयांनी कमी झाली आहे. आता दिल्लीत 2354 ऐवजी 2219 रुपयांना मिळणार आहे. 1 मे रोजी दरात सुमारे 100 रुपयांनी वाढ झाली होती.
PMJJBY प्रीमियममध्ये वाढ
7 वर्षांनंतर, केंद्र सरकारने प्रधानमंत्री जीवन ज्योती विमा योजनेच्या (PMJJBY) प्रीमियममध्ये वाढ जाहीर केली आहे. हा बदल १ जूनपासून लागू झाला आहे. PMJJBY अंतर्गत, लाभार्थीला 2 लाख रुपयांचे संरक्षण मिळते. केंद्र सरकारच्या या विमा योजनेसाठी यापूर्वी 330 रुपये आकारले जात होते. पण आता त्याचा हप्ता प्रतिदिन १.२५ रुपयांनी वाढला आहे. आता यासाठी वार्षिक ४३६ रुपये प्रीमियम भरावा लागेल.
PMSBY प्रीमियममध्येही वाढ
प्रधानमंत्री जीवन ज्योती विमा योजनेव्यतिरिक्त, सरकारने प्रधानमंत्री सुरक्षा विमा योजनेच्या (PMSBY) प्रीमियममध्येही वाढ केली आहे. यापूर्वी यासाठी वर्षाला 12 रुपये मोजावे लागत होते. पण आता 1 जूनपासून हा प्रीमियम वाढून 20 रुपये झाला आहे.
SBI ने एक्सटर्नल बेंचमार्क लेंडिंग रेट वाढवला
सार्वजनिक क्षेत्रातील सर्वात मोठी बँक स्टेट बँक ऑफ इंडिया (SBI) ने एक्सटर्नल बेंचमार्क लेंडिंग रेट (EBLR) वाढवला आहे. नवे दर १ जूनपासून लागू झाले आहेत. पूर्वी हा दर 6.65 टक्के होता परंतु 40 बेसिस पॉईंटच्या वाढीसह तो आता 7.05 टक्के झाला आहे. याशिवाय, होम लोनसाठी रेपो लिंक्ड लेंडिंग रेट देखील 40 बेसिस पॉइंट्सने वाढून 6.65 टक्के झाला आहे. याचा तुमच्या EMI वर परिणाम होईल.
अॅक्सिस बँक सेवा शुल्क वाढ
अॅक्सिस बँकेने ग्रामीण आणि शहरी भागातील खातेदारांसाठी सरासरी मासिक शिलकीची मर्यादा 15 हजारांवरून 25 हजार रुपये केली आहे. Axis बँकेने 1 जून 2022 पासून बचत/पगार खात्यासाठी दर संरचनेत बदल केला आहे. ऑटो डेबिट ऍक्सेस नसल्याचा दंडही पूर्वीच्या तुलनेत वाढला आहे. तसेच किमान शिल्लक न ठेवल्यास आता अधिक सेवा शुल्क भरावे लागणार आहे.
सोन्याच्या हॉलमार्किंगचा दुसरा टप्पा लागू
सोन्याच्या हॉलमार्किंगचा दुसरा टप्पा १ जूनपासून लागू करण्यात आला आहे. या बदलामुळे जुन्या 256 जिल्ह्यांमध्ये आणि इतर 32 जिल्ह्यांमध्ये हॉलमार्किंग केंद्र सुरू होतील. आता 1 जूनपासून नवीन आणि जुन्या 288 जिल्ह्यांमध्ये हॉलमार्किंग आवश्यक होणार आहे. ज्वेलर्स यापुढे हॉलमार्किंगशिवाय दागिन्यांची विक्री करू शकणार नाहीत. अशा स्थितीत हॉलमार्किंगशिवाय दागिने खरेदी करू नका, असा सल्लाही ग्राहकांना दिला जातो. हॉलमार्किंग मानकांनुसार, 1 जूनपासून 14, 18, 20, 22, 23 आणि 24 कॅरेटचे दागिने विकले जातील.
पंतप्रधान गरीब कल्याण अन्न योजनेत बदल
पंतप्रधान गरीब कल्याण अन्न योजनेअंतर्गत देशातील अनेक राज्यांमध्ये मोफत उपलब्ध गव्हाचा कोटा कमी करण्यात आला आहे. यूपी, बिहार आणि केरळमध्ये 1 जूनपासून आता 3 किलो गहू आणि 2 किलो तांदूळ ऐवजी फक्त 5 किलो तांदूळ मिळणार आहे. गव्हाची कमी खरेदी झाल्याने हा निर्णय घेण्यात आला आहे. काही राज्यांमध्ये पूर्वीप्रमाणेच गहू मिळत राहतील आणि येथील रेशन वितरणावर कोणताही परिणाम होणार नाही.
मोटार विम्याच्या प्रीमियममध्ये वाढ
रस्ते, वाहतूक आणि महामार्ग मंत्रालयाने 1 जूनपासून मोटार विम्याच्या प्रीमियममध्ये वाढ केली आहे. आता इंजिन क्षमतेनुसार वेगवेगळ्या वाहनांसाठी विम्याचा हप्ता भरावा लागणार आहे. याचा परिणाम दुचाकी आणि चारचाकी अशा दोन्ही वाहनांवर होणार आहे. 1000 सीसी इंजिन क्षमतेच्या कारसाठी विमा प्रीमियम 2,094 रुपये असेल. त्याचबरोबर 1000 ते 1500 सीसी कारचा विमा हप्ता 3416 रुपये असेल.
वाहनांचा विमाही महाग
सरकारने जारी केलेल्या अधिसूचनेमुळे १ जूनपासून दुचाकी वाहनांचा विमाही महाग झाला आहे. 1 जूनपासून 75 सीसीपेक्षा कमी क्षमतेच्या दुचाकीसाठी 538 रुपये, 75 ते 150 सीसी क्षमतेच्या दुचाकीसाठी 714 रुपये, 150 ते 350 सीसीच्या दुचाकीसाठी 1366 रुपये आणि त्याहून अधिक क्षमतेच्या दुचाकीसाठी 2804 रुपये थर्ड पार्टी विमा प्रीमियम द्यावा लागणार आहे.
इंडिया पोस्ट पेमेंट बँकेने आधार आधारित पेमेंट सर्व्हिस (AePS) देखील शुल्क आकारले आहे. मात्र, हा नियम १५ जूनपासून लागू होणार आहे. 15 जूनपासून, आधार सक्षम पेमेंट सिस्टम सेवा शुल्कांतर्गत दर महिन्याला पहिले तीन व्यवहार विनामूल्य असतील. यामध्ये रोख पैसे काढणे, रोख रक्कम जमा करणे आणि मिनी स्टेटमेंट काढणे समाविष्ट आहे. विनामूल्य मर्यादेनंतर पैसे काढणे आणि जमा केल्यानंतर, तुम्हाला प्रत्येक व्यवहारासाठी 20 रुपये द्यावे लागतील. त्याच वेळी, मिनी स्टेटमेंटचे शुल्क 15 रुपये आहे.