जळगाव लाईव्ह न्यूज । ६ सप्टेंबर २०२३ । जळगाव जिल्ह्यात आणखी एका भीषण अपघातात तरुणाला जीव गमवावा लागलाय. रावेर तालुक्यातील अहिरवाडी येथील युवकाला भरधाव ट्रकने चिरडल्याची घटना घडलीय. मनोहर उर्फ मनोज कडू वाघ (वय-२५, रा. अहिरवाडी ता. रावेर) असं मृत तरुणाचे नाव असून याबाबत रावेर पोलीस ठाण्यात अकस्मात मृत्यूची नोंद करण्यात आली आहे.
मनोहर उर्फ मनोज कडू वाघ हा रावेर तालुक्यातील अहिरवाडी येथे आपल्या कुटुंबियांसह वास्तव्यास असून, हातमजूरी करुन तो कुटुंबाचा उदनिर्वाह करीत होता. ५ सप्टेंबर रोजी सकाळी तो दुचाकीने नेरुळ येथे कामावर जात असतांना भरधाव ट्रकने त्याला धडक दिली. यात मनोहर दुचाकीवरुन रस्त्यावर कोसळताच ट्रकने चिरडल्याने तो जागीच ठार झाला.
अपघाताची माहिती मिळताच मनोहरच्या मित्रांसह नातेवाईकांनी घटनास्थळी धाव घेत त्याला लागलीच रुग्णालात दाखल केले. याठिकाणी वैद्यकीय अधिकाऱ्यांनी त्याची तपासणी करीत मयत घोषीत केल. मनोहरच्या पश्चात आई, वडील, पत्नी व मुलगा असा परिवार असून त्याची पत्नी गरोदर असल्याने त्याच्या कुटुंबावर दु:खाचा डोंगर कोसळला आहे. याबाबत रावेर पोलीस ठाण्यात अकस्मात मृत्यूची नोंद करण्यात आली आहे.