जळगाव लाईव्ह न्यूज । २८ सप्टेंबर २०२२ । जर तुमच्याकडे रेशन कार्ड असेल आणि तुम्ही प्रधानमंत्री गरीब कल्याण अन्न योजना (PMGKAY) अंतर्गत मोफत रेशन घेत असाल तर ही बातमी तुमच्या उपयोगाची आहे. कारण ही योजना एप्रिल 2020 मध्ये कोविड काळात सुरू करण्यात आली होती. नंतर मार्च 2022 मध्ये ही योजना सहा महिन्यांसाठी सप्टेंबरपर्यंत वाढवण्यात आली. आता अशातच सरकार या योजनेत पुन्हा एकदा वाढ करण्याबाबतची माहिती समोर आलीय.
80 कोटी लोक थेट जोडले गेले
सरकारच्या या योजनेची चर्चा होत आहे कारण या योजनेशी 80 कोटी लोक थेट जोडले गेले आहेत. मीडिया रिपोर्ट्सनुसार, केंद्र सरकारने पुन्हा एकदा मोफत रेशन वितरणाची ही सर्वात मोठी योजना सहा महिने (मार्च 2023 पर्यंत) वाढवण्याचा निर्णय घेतला आहे. केंद्रीय अन्न विभागाच्या सचिवांनीही तसे संकेत दिले आहेत. मात्र, याबाबत अधिकृत घोषणा करण्यात आलेली नाही.
आतापर्यंत 3.40 लाख कोटी रुपये खर्च झाले आहेत
अधिकाऱ्यांच्या मते, प्रधानमंत्री गरीब कल्याण अन्न योजना (PMGKAY) ही जगातील सर्वात मोठी अन्न योजना आहे. यासाठी सरकारकडे धान्याचा पुरेसा साठा आहे. यासाठी सरकारकडून स्टॉकच्या स्थितीचाही आढावा घेण्यात आला. या योजनेवर सरकारने आतापर्यंत 3.40 लाख कोटी रुपये खर्च केले आहेत. अशा स्थितीत या योजनेत वाढ करून शिधापत्रिकाधारकांना थेट फायदा होणार आहे.
योजने अंतर्गत लाभ
केंद्र सरकारच्या या योजनेंतर्गत देशातील सर्व गरीब शिधापत्रिकाधारक कुटुंबांना प्रति व्यक्ती ५ किलो रेशन दिले जाते. सुरुवातीला या योजनेंतर्गत कुटुंबाला एक किलो हरभरा डाळ आणि आवश्यक मसाल्यांचे एक किट देण्यात आले. पूर्वी ही योजना फक्त शिधापत्रिकाधारकांसाठी होती. पुढे त्या गरीब कुटुंबांचीही त्यात भर पडली, ज्यांच्याकडे शिधापत्रिका नव्हती.
