जळगाव लाईव्ह न्यूज । जळगाव, भुसावळ मार्गे पुणे, नागपूर मार्गावर प्रवास करणाऱ्या रेल्वे प्रवाशांसाठी आनंदाची बातमी आहे. मुंबई-बंगळुरू मार्गावर स्लीपर वंदे भारत एक्सप्रेसला मिळत असलेल्या प्रतिसादानंतर आता नागपूर ते पुणे या महत्त्वाच्या मार्गावरही स्लीपर वंदे भारत सुरू होण्याची शक्यता वर्तवली जात आहे. ही ट्रेन सुरू झाल्यास विदर्भासह उत्तर महाराष्ट्रातील प्रवाशांना मोठा दिलासा मिळू शकतो. विशेष म्हणजे, या मार्गावरील भुसावळ आणि जळगाव स्थानकांचा समावेश असल्याने जिल्ह्यातील प्रवाशांमध्येही उत्सुकता वाढली आहे.
नागपूर हे विदर्भातील प्रमुख शहर, तर पुणे हे शिक्षण, आयटी, उद्योग आणि रोजगाराचे मोठे केंद्र आहे. त्यामुळे या दोन्ही शहरांदरम्यान विद्यार्थी, नोकरदार, व्यावसायिक आणि इतर प्रवाशांची मोठी ये-जा असते. सध्या नागपूर-पुणे मार्गावर चेअरकार प्रकारातील वंदे भारत एक्सप्रेस धावत आहे. मात्र, या प्रवासासाठी सुमारे १२ तास लागत असल्याने संपूर्ण प्रवास खुर्चीवर बसून करणे अनेक प्रवाशांसाठी गैरसोयीचे ठरते. विशेषतः ज्येष्ठ नागरिक, लहान मुलांसह प्रवास करणारी कुटुंबे आणि रात्रीचा प्रवास करणाऱ्यांना स्लीपर सुविधेची गरज भासते.
१६ डब्यांची स्लीपर ट्रेन असण्याची शक्यता
मिळालेल्या माहितीनुसार, नागपूर-पुणे मार्गावर प्रस्तावित स्लीपर वंदे भारत एक्सप्रेसमध्ये एकूण १६ डबे असण्याची शक्यता आहे. या ट्रेनमध्ये थ्री-टियर एसी, टू-टियर एसी आणि फर्स्ट क्लास एसी अशा तीन श्रेणी उपलब्ध होऊ शकतात. आधुनिक सुविधा, आरामदायी शयनयान व्यवस्था आणि ताशी १६० किलोमीटरपर्यंत वेग गाठण्याची क्षमता यामुळे प्रवाशांचा प्रवास अधिक आरामदायी आणि जलद होण्याची अपेक्षा आहे.
जळगाव आणि भुसावळच्या प्रवाशांसाठी महत्त्वाची ठरणार
या प्रस्तावित रेल्वेसेवेचा सर्वाधिक फायदा कोणत्या भागांना होणार, याकडे प्रवाशांचे लक्ष लागले आहे. सध्याच्या नागपूर-पुणे वंदे भारत एक्सप्रेसला अजनी, वर्धा, बडनेरा, अकोला, शेगाव, भुसावळ, जळगाव, मनमाड आणि दौंड यांसारख्या स्थानकांवर थांबे आहेत. त्यामुळे प्रस्तावित स्लीपर वंदे भारतलाही हे थांबे मिळाल्यास जळगाव आणि भुसावळमधील प्रवाशांना पुण्यापर्यंत आरामदायी प्रवासाचा पर्याय उपलब्ध होऊ शकतो.
विशेषतः शिक्षण, नोकरी, व्यवसाय आणि उपचारांसाठी पुण्याला जाणाऱ्या जळगाव जिल्ह्यातील नागरिकांसाठी ही सेवा उपयुक्त ठरू शकते. रात्रीचा प्रवास शयनयान सुविधेत करता येणार असल्याने वेळेची बचत आणि प्रवासातील थकवा कमी होण्यास मदत होईल.
मात्र, नागपूर-पुणे स्लीपर वंदे भारतबाबत अद्याप अधिकृत घोषणा, अंतिम थांबे आणि सुरू होण्याची तारीख स्पष्ट झालेली नाही. त्यामुळे रेल्वे प्रशासनाकडून अधिकृत निर्णय जाहीर होण्याची प्रवाशांना प्रतीक्षा आहे. ही सेवा प्रत्यक्षात सुरू झाल्यास जळगाव आणि भुसावळच्या रेल्वे प्रवाशांसाठी ती महत्त्वाची सुविधा ठरू शकते.
