जळगाव लाईव्ह न्यूज । २१ जून २०२५ । विधानसभा निवडणुकीपूर्वी राज्य सरकारने मुख्यमंत्री लाडकी बहीण योजना सुरु केली असून पात्र महिलांना दरमहा १५०० रुपयाचा लाभ मिळत आहे. आतापर्यत ११ हप्त्याचे पैसे लाडक्या बहिणींच्या खात्यात जमा करण्यात आले आहे. अशातच सरकार लाडक्या बहिणींसाठी आता कर्ज उपलब्ध करुन दिले जाणार आहे. विशेष बाब म्हणजे शून्य टक्के दराने हे कर्ज दिले जाणार आहे.
लाडकी बहीण योजनेच्या लाभार्थी महिलांना आता आर्थिकदृष्ट्या अधिक सक्षम करण्यासाठी नऊ टक्के अल्प व्याजदराने कर्ज उपलब्ध करून देण्यात येणार आहे, असे मुख्यमंत्री देवेंद्र फडणवीस यांनी सांगितले. शासनामार्फत सुरू असलेल्या महिलांसाठीच्या व्याज परतावा योजनेची मुंबई बँकेच्या कर्ज योजनेसह सांगड घालून महिलांना आर्थिक सक्षम करण्यासंदर्भात वर्षा निवासस्थानी झालेल्या बैठकीत चर्चा करण्यात आली.
मुख्यमंत्री देवेंद्र फडणवीस म्हणाले की, महिलांना स्वयंपूर्ण उद्योजक बनविण्यासाठी हा उपक्रम महत्वपूर्ण ठरणार आहे. महिला आर्थिकदृष्ट्या सक्षम व्हाव्यात यासाठी महामंडळ आणि ‘मुंबै बँक संयुक्तपणे हा उपक्रम राबविणार आहे. मुंबईतील मुख्यमंत्री माझी लाडकी बहीण योजनेच्या लाभार्थींना आर्थिक साक्षर करण्यासाठी या उपक्रमाच्या माध्यमातून वैयक्तिक आणि सामूहिक कर्ज देऊन त्यांना उद्योग तसेच व्यवसाय उभारणीसाठी मदत केली जाईल.
तसेच पर्यटन संचालनालय, अण्णासाहेब पाटील आर्थिक मागास विकास महामंडळ, वसंतराव नाईक विमुक्त जाती व भटक्या जमाती विकास महामंडळ, महाराष्ट्र राज्य इतर मागासवर्गीय वित्त आणि विकास महामंडळ अंतर्गत विविध वैयक्तिक व गट कर्ज योजना राबविण्यात येतात. यामुळे महिलांना स्वत:चा व्यवसाय व उद्योग सुरू करण्यासाठी नऊ टक्के इतक्या अल्प व्याजदरात कर्ज उपलब्ध करून देण्यात येणार आहे, असे मुख्यमंत्री देवेंद्र फडणवीस यांनी सांगितले.
शून्य टक्के दराने कर्ज कसे मिळणार?
मुंबै बँकेचे अध्यक्ष प्रवीण दरेकर यांनी एबीपी माझा वृत्तवाहिनीला प्रतिक्रिया देताना सांगितले की, मुंबै बँकेने लाडक्या बहिणींसाठी कर्ज धोरण आणले. 9 टक्के व्यज दराने हे कर्ज देण्याचा निर्णय केला. राज्य सरकारच्या चार महामंडळाच्या योजना आअशा आहे ज्या 12 टर्कयांपर्यंतच्या व्याजाचा परतावा देतात. उदाहरणार्थ, अण्णासाहेब आर्थिक विकास महामंडळ, पर्यटन महामंडळाची आई योजना, भटक्या विमुक्तांसाठीचं महामंडळ आणि ओबीसी महामंडळांच्या योजनांमधून व्याजाचा परतावा दिला जातो. आम्ही ज्या महिलांना कर्ज पुरवठा करत आहोत त्या महिला या योजनेत बसत अससतील तर या महिलांना शून्य टक्के व्याज दराने कर्ज उपलब्ध होऊ शकतं.
