जळगाव लाईव्ह न्यूज । २६ मार्च २०२५ । नोव्हेंबर आणि डिसेंबर महिन्यातील अवकाळी पावसामुळे बाधित झालेल्या धुळे व जळगाव जिल्ह्यातील २६९७ शेतकऱ्यांसाठी भरपाईची रक्कम प्राप्त झाली आहे. त्यामुळे या शेतकऱ्यांच्या बँक खात्यात लवकरच ३ कोटी २२ लाख ३ हजारांची रक्कम जमा करण्यात येणार आहे.
गेल्या वर्षी नोव्हेंबर आणि डिसेंबर महिन्यात अवकाळी पाऊस व गारपिटीमुळे यावल व रावेर तालुक्यातील शेती पिकांना मोठा फटका बसला होता. मुख्यत्वे केळी उत्पादक भाग असणाऱ्या या भागातील केळीच्या बागा पाऊस आणि गारांच्या माऱ्याने कोलमडून पडल्या होत्या. तर रब्बीच्या पिकांसह केळी बागांचे नुकसान झाले होते.हरभरा, गहू, तूर, पपई या पिकांचेही मोठे नुकसान झाले होते. अनेक ठिकाणी सीसीआय केंद्रावर शेतकऱ्यांनी बैलगाड्यांमध्ये आणलेला कापूसदेखील ओला झाल्याने त्यांना आर्थिक नुकसान सहन करावे लागले होते.
या गावांना बसला होता फटका?
यावल तालुक्यातील भालोद, बामणोद, आमोदा, म्हैसवाडी, राजोरा, बोरावल तर रावेर तालुक्यातील सावद, चिनावल, वाघोड कोंद यासह अनेक गावांना पावसाचा मोठा फटका बसला होता.
रावेर व यावल तालुक्यात ११०८ हेक्टरवरील पिकांचे नुकसान झाले होते. दोन्ही तालुक्यांतील २९ गावातील १४०७ शेतकरी बाधित झाल्याचा अहवाल कृषी विभागाने सादर केला होता. यात सर्वाधिक ५८८ हेक्टरवरील हरभऱ्याचे तर ३८४ हेक्टरवरील केळीचे नुकसान झाले होते. तूर, गहू व मक्याच्या पिकांचे काहीअंशी नुकसान झाले होते. जिल्हा प्रशासनाने नुकसानाचा अहवाल राज्य शासनाकडे सादर केल्यानंतर १९ मार्च रोजी ३ कोटी २२ लाख ३ हजारांची भरपाईची रक्कम मंजूर करण्यात आली आहे. भरपाईची रक्कम लवकरच शेतकऱ्यांच्या बँक खात्यात जमा केली जाणार असल्याचे सूत्रांनी सांगितले.
