जळगाव लाईव्ह न्यूज । १४ मार्च २०२१ ।  जळगाव शहरातील दुधफेडरेशनच्या मागील बाजूस असलेल्या राजमालतीनगरमध्ये पतीनेच पत्नीच्या अंगावर उकळते पाणी टाकल्याची धक्कादायक घटना आज रविवारी सकाळी घडली. या घटनेत फरजानाबी शेख जाबीर (वय ४२) महिला भाजल्याने तिला उपचारासाठी शासकीय वैद्यकीय महाविद्यालय व रुग्णालयात दाखल करण्यात आले आहे.

जखमी फरजानाबी यांनी पोलिसांना दिलेल्या जबाबानुसार, राजमालतीनगरातील प्लॉट नं. ७ येथे फरजानाबी, पती जाबीर शेख, मुल अश्पाक व शोएब अशांसह वास्तव्यास आहेत. पती जाबीर सुपारी फोडण्याचे काम करतात तर फरजाना या धुणीभांडी करुन संसाराला हातभार लावतात. आज रविवार (ता.१४) सकाळी साडे आठ वाजेच्या सुमारास नेहमी प्रमाणे मुलं व पतीसाठी नाष्टा व स्वयंपाकासाठी फरजाना कणीक मळत होत्या, त्याच वेळेस पती जाबीरशेख अंघोळीला जाणार असल्याने बाथरुम मध्येच बादलीत हिटर लावुन पाणी तापवण्यात येत  होते.

बादलीतील पाणी उकळल्यावर पती जाबीर याने काहीएक न बोलता  उकळत्या पाण्याची बादली उचलून फरजाना यांच्या अंगावर उलटी केली. अचानक अंगावर उकळते पाणी पडल्याने किंचाळ्या मारतच फरजाना धावत सुटल्या.  दोघा मुलांनी मदतीला धाव घेतल्यावर जाबीर यांनी दोघा मुलांना मारहाण केली. जावाई गुलाब शेख व दोघा मुलांनी जखमी फरजाना यांना जखमी अवस्थेत जिल्‍हा रुग्णालयात दाखल केले असुन त्यांच्या जबाबावरुन पती जाबीर यांच्या विरुद्ध गुन्ह्याची नोंद करण्यात आली.

जळगाव लाईव्ह न्यूज । १४ मार्च २०२१ । शहरातील फातेमा नगरात शनिवारी रात्री झालेल्या हाणामारीप्रकरणी एमआयडीसी पोलिसात परस्परविरोधी गुन्हे दाखल करण्यात आले आहे. दरम्यान, पोलिसांनी दोन्ही गटातील संशयितांना ताब्यात घेतले असून जखमींवर जिल्हा रुग्णालयात उपचार सुरू आहे.

पहिल्या तक्रारीनुसार सतिष सुनील पाटील रा.इंदिरानगर यांच्या फिर्यादीवरून रेहान सालार, साजिद सालार, आमीर सालार यांच्याविरुद्ध गुन्हा दाखल करण्यात आला आहे. दुसऱ्या तक्रारीनुसार रेहान सालार यांच्या फिर्यादीवरून ५ ते ६ अनोळखी लोकांविरुद्ध तक्रार दाखल केली आहे.