जळगाव लाईव्ह न्यूज । १६ मार्च २०२१ । चेतन वाणी । शहरात जळगाव मनपात महापौरपदी प्रतिभा कापसे तर उपमहापौरपदी सुरेश सोनवणे यांना संधी देण्याचा निर्णय भाजप पक्षश्रेष्ठींनी जवळपास निश्चित केला होता. जिल्ह्याचे नेते आ.गिरीष महाजन यांना यासाठी जिल्हाध्यक्ष आ.राजुमामा भोळे सूचक होते. दोघांना विरोध असला तरीही त्यांनाच संधी द्यावी यामागे ते ५-६ नगरसेवक फोडू शकतात ही चिंता आ.भोळे यांना भेडसावत होती. आमदारांच्या चिंतेने घात केला आणि ३० नगरसेवक भाजपातून दुरावले.

जळगाव शहर मनपात भाजपाची एकहाती सत्ता आल्यानंतरच अंतर्गत गटबाजी सुरू झाली होती. माजी मंत्री आ.गिरीष महाजन यांनी वारंवार नगरसेवक, पदाधिकाऱ्यांना समज दिली परंतु त्याचा फारसा उपयोग झाला नाही. अंतर्गत गटबाजीतच जिल्हाध्यक्ष तथा आ.सुरेश भोळे यांच्याविरुद्ध असलेल्या नाराजीने वेगवेगळे गट निर्माण झाले त्यातच भाजप पक्षप्रवेश करताना त्यांनी अनेकांना शब्द दिलेले असल्याने ती अडचण समोर होती.

महापौर सौ.भारती सोनवणे यांचा कार्यकाळ संपत असल्याने त्यांना मुदतवाढ द्यावी, प्रतिभा कापसे, ज्योती चव्हाण, उज्ज्वला बेंडाळे यांना संधी द्यावी अशी चर्चा रंगू लागली होती. भाजपच्या यादीत प्रतिभा कापसे यांचे महापौरपदी तर सुरेश सोनवणे यांचे नाव आघाडीवर होते. पक्षाकडून त्यांना प्राधान्य देण्यामागे आ.राजुमामा भोळे यांना भेडसावत असलेली चिंता होती. राष्ट्रवादीतून भाजपात येताना पक्षाने त्यांना काही आश्वासने दिली होती. नगरसेवक आबा कापसे १२ नगरसेवकांचा पाठिंबा असल्याचा दावा करीत होते. जर त्यांना संधी दिली नाही तर ते ५-६ नगरसेवक फोडू शकतात ही भीती आ.भोळे यांना होती. नेमकी हीच भिती घेऊन आ.भोळे कापसे आणि सोनवणे यांच्या नावाचा आग्रह करीत होते. आग्रह वाढत गेला तसतशी नाराजी वाढली आणि त्याच नाराजीने घात केला. भाजपच्या नवग्रह मंडळीने गेम खेळला आणि ३० नगरसेवक घेऊन त्यांनी शिवसेनेची वाट धरली.

जिल्ह्याचे नेते आमदार गिरीश महाजन यांना दोन दिवसांपूर्वी हलक्यात वाटणारी गोष्ट आज गंभीर होऊन बसली असून संकटमोचक स्वतःच संकटात सापडले आहेत. दुसरीकडे आमदार राजुमामा भोळे यांचा हट्टीपणा पक्षाला भोवणार  असून दोघांनी या घटनेतून काहीतरी धडा घ्यावा हीच माफक अपेक्षा जळगावकर व्यक्त करीत आहेत.

हे देखील वाचा : 

होय… भाजपचे ३० नगरसेवक फुटले… कुलभूषण पाटलांसह ३३ नगरसेवकांचा शिवसेनेत प्रवेश

भाजपच्या सत्ता उतार होण्याचा काळा वर्तमान

नऊग्रहांनी बदलले जळगाव मनपाचे राजकारण

आ.राजुमामा भोळेंमुळे फुटणार भाजप?