जळगाव लाईव्ह न्यूज । १२ डिसेंबर २०२४ । सध्याच्या काळात फसवणुकीच्या घटना मोठ्या प्रमाणात वाढताना दिसत आहे. विविध प्रकारचे आमिष दाखवून नागरिकांना घडविले जात असल्याच्या बातम्या सातत्याने समोर येत आहे. आता अशीच एक बातमी जळगावातून समोर आलीय. विशेष या घटनेत व्यापाऱ्याला जावयानेच लाखोंचा चुना लावला आहे. मोठ्या परताव्याचे आमिष दाखवत पिंप्राळ्यामधील वृद्ध व्यापाऱ्याची पुतणीचा पती व त्याच्या भावाने ४८ लाख ५६ हजार रुपयांत फसवणूक केल्याचा प्रकार समोर आला आहे.

व्यापाऱ्याने पैसे मागितल्यावर त्यांना जीवे ठार मारण्याची धमकी दिली. याप्रकरणी बुधवारी दुपारी रामानंदनगर पोलिस ठाण्यात गुन्हा दाखल करण्यात आला आहे. पिंप्राळ्यामधील व्यापारी गोपाल प्रभुलाल राठी (६३) यांनी त्यांची एमआयडीसीतील कंपनी २०१८-१९ मध्ये विकल्याने ८८ लाख रुपये मिळाले होते. पुतणी वर्षा विजय मंडोरे, जावई विजय जगदीश मंडोरे आणि जावयाचा भाऊ लक्ष्मीनारायण मंडोरे यांना ही माहिती होती.

दरम्यान, वकिल असलेल्या वर्षाला विजय व लक्ष्मीनारायण भूसंपादनाच्या केसेसमध्ये मदत करत. मंडोरे दांपत्याने काही लोकांकडून पैसे घेतलेले होते. त्यांनी राठी यांना पैसे दिले तर त्याच्या ५ ते ६ पट परतावा देऊ असे आमिष दाखवले. यावर सुरुवातीला राठी यांचा विश्वास बसला नाही. त्यानंतर पुन्हा वर्षा आणि लक्ष्मीनारायणमार्फत विजयने प्रयत्न केले, त्यांच्या दबावाने राठी यांनी वेळ मागून घेतला. नंतर वेळोवेळी विजय, लक्ष्मीनारायण यांना ४८ लाख ५६ हजार रुपये दिले. त्यानंतर राठी यांनी डिसेंबर २०२३ पासून परतावा मागितला असता हुसकावून लावले आणि जीवे ठार मारण्याची धमकी दिली. तसेच तुमचे पैसे बुडाले असे घुडकावून लावले. फसवणूक झाल्याचे लक्षात आल्यानंतर राठी यांनी ११ डिसेंबर रोजी पोलिस ठाण्यात तक्रार दिली. यावरुन विजय मंडोरे आणि त्याचा भाऊ लक्ष्मीनारायण मंडोरे यांच्या विरोधात गुन्हा दाखल करण्यात आला आहे.

जळगाव लाईव्ह न्यूज । ११ डिसेंबर २०२४ । जळगावात अपघाताचे सत्र कमी होताना दिसत नसून अशातच भरधाव डंपरने पुढे जाणाऱ्या दुचाकीला उडवल्याने एका तरुणाचा जागीच मृत्यू झाल्याची घटना आज बुधवारी दुपारी जळगाव शहरातील आरएल चौफुलीनजीक घडली. आसिफ हाजी शौकत कुरेशी (वय 40 रा. आशा नगर, सुप्रीम कॉलनी जळगाव) असे मयत झालेल्या तरुणाचे नाव असून याबाबत एमआयडीसी पोलीस ठाण्यात गुन्हा दाखल करण्याचे काम सुरू होते.

या घटनेबाबत असे की, उत्तर प्रदेश येथील रहिवासी असलेले आसिफ कुरेशी हा तरुण आपल्या पत्नी व चार मुलांसह जळगाव शहरातील सुप्रीम कॉलनी परिसरातील आशानगर येथे वास्तव्याला होते. वॉल फिटिंगचे काम करून ते आपला उदरनिर्वाह करत होते. बुधवारी 11 डिसेंबर रोजी दुपारी ते गावात दुचाकी क्रमांक (एमएच 19 डीसी 1751) ने गेलेले होते. जळगाव शहरातील काम आटपून ते दुपारी 3.30 वाजता घरी जाण्यासाठी निघाले होते. त्यावेळी एमआयडीसीतील आर. एल. चौफुली येथून जात असताना त्याच्या मागून येणारे डम्पर क्रमांक (एमएच 19 सीएक्स 4940) ने मागून जोरदार धडक दिली.

आसिफ कुरेशी यांचा जागेवरच मृत्यू झाला. दरम्यान ही घटना घडल्यानंतर एमआयडीसी पोलिसांनी घटना स्थळी धाव घेतली. पंचनामा करून मृतदेह जिल्हा शासकीय वैद्यकीय महाविद्यालय रवाना करण्यात आला. यावेळी नातेवाईकांनी मोठ्या प्रमाणात गर्दी पाहायला मिळाली. याबाबत एमआयडीसी पोलीस ठाण्यात गुन्हा दाखल करण्याचे काम सुरू होते. त्यांच्या पश्चात पत्नी, 3 मुली आणि 1 मुलगा असा परिवार आहे.