जळगाव लाईव्ह न्यूज । २२ ऑगस्ट २०२२ । येत्या काही दिवसात सणासुदीचे दिवस चालू होतील. त्यापूर्वी जर तुम्ही सोने खरेदीचा विचार करत असाल तर तुमच्यासाठी एक आनंदाची बातमी आहे. सरकार जनतेला स्वस्त दरात सोने खरेदी करण्याची संधी देत आहे. खरंतर आर्थिक वर्ष 2022-23 साठी सार्वभौम गोल्ड बाँड (SGB) योजनेची दुसरी मालिका आजपासून सुरू होत आहे. त्याअंतर्गत सोन्याचा प्रति ग्रॅमचा भाव 5,197 रुपये निश्चित करण्यात आला आहे. ही योजना फक्त पाच दिवसांसाठी (२२ ते २६ ऑगस्ट २०२२) खुली आहे. या काळात गुंतवणूकदारांना बाजारापेक्षा कमी दरात सोने खरेदी करण्याची संधी मिळेल.
सार्वभौम गोल्ड बाँड म्हणजे काय?
हे सरकारी कर्जरोखे आहे. सार्वभौम सुवर्ण बाँडमध्ये, सरकार गुंतवणूकदारांना प्रत्यक्ष सोने देत नाही, परंतु सोन्यात पैसे गुंतवण्याची संधी देते. सोन्याची भौतिक मागणी कमी करण्याच्या उद्देशाने नोव्हेंबर 2015 मध्ये सरकारी गोल्ड बाँड योजना प्रथम सुरू करण्यात आली होती. आरबीआय हे रोखे सरकारच्या वतीने जारी करते. 2022-23 या आर्थिक वर्षासाठी या योजनेची पहिली मालिका जून 1 मध्ये उघडण्यात आली.
ऑनलाइन खरेदीवर 50 रुपये प्रति ग्रॅम सूट मिळेल
ऑनलाइन अर्ज करणाऱ्या गुंतवणूकदारांना प्रति ग्रॅम 50 रुपये सूट देण्याचा निर्णय घेण्यात आला आहे. यासाठी त्यांना डिजिटल माध्यमातून पेमेंट करावे लागेल. याचा अर्थ ऑनलाइन पेमेंट करणाऱ्या गुंतवणूकदारांसाठी गोल्ड बाँडची इश्यू किंमत 5,147 रुपये प्रति ग्रॅम असेल.
