जळगाव लाईव्ह न्यूज । ५ एप्रिल २०२१ । ऑक्सिजन साठी आर्थिक मदत करा असे सामाजिक आवाहन सामाजिक कार्यकर्ते व सुकाणू समिती सदस्य एस बी पाटील यांनी चोपडेकरांना केले होते. त्याची दखल घेत सामाजिक कार्यकर्ते, दानशूर व्यक्ती, विविध संघटना व जनतेने सढळ हाताने मदत करून ऑक्सिजन टॅंक खरेदीसाठी लोकवर्गणी देणे सुरू केले. एक लाखाच्या निधी जमा झाल्याने ॲडव्हान्स देऊन ते बुकिंग पक्के केले.
दरम्यान शनिवारी पूर्ण पेमेंट देणे गरजेचे असल्याने हातेड खुर्द येथील उद्योजक राहुल सोनवणे यांच्याकडून हात उसनवारीने उर्वरित रक्कम घेऊन उर्वरित रकमेचा साडेतीन लाखाचा चेक पाठवून ऑर्डर कन्फर्म केले.
रात्री वाई – सातारा येथून कंपनीतून ड्युरा टॅंक निघून रविवारी सकाळी ऑक्सिजनचे दोन ड्युरा टॅंक चोपड्यात दाखल झाले . प्रत्येक टॅंक मध्ये 200 लिटर ऑक्सिजनची क्षमता असणार आहे . चोपडा उपजिल्हा रुग्णालयास मोठी मदत झाली असून त्याबद्दल तहसीलदार अनिल गावीत व सुकाणू समिती सदस्य एस. बी.पाटील, डॉक्टर, कर्मचारी, विविध क्षेत्रातील मान्यवर व जनतेने मदत करणाऱ्या दानशूर यांचे विशेष धन्यवाद व्यक्त केले आहेत.
कोरोनाचा दुसऱ्या लाटेने संपूर्ण जनजीवन विस्कळीत झाले आहे. एवढी भीषण परिस्थिती असताना उपजिल्हा रुग्णालयातील कोविड हेल्थ सेंटर, महाविद्यालयातील कोविड केअर सेंटर व नवीन प्रशासकीय इमारतीत उपचारासाठी दाखल असलेल्या प्रत्येक गोरगरीब व गरजू रुग्णांचा जीव वाचवण्यासाठी त्यांना लागणाऱ्या महत्त्वाच्या ऑक्सिजन (प्राणवायू) उपलब्ध करणे, आर्थिक अडचणीमुळे जिकरीचे होत आहे. दुसरीकडे फुकट मिळणाऱ्या ऑक्सिजनची किंमत आज आपल्याला कळत नाही परंतु मायबाप कोरोना रुग्णांचे प्राण वाचवण्यासाठी ऑक्सीजन करिता मानवतेच्या दृष्टिकोनातून मदत करा असे आवाहन व आर्त हाक सुकाणू समिती सदस्य एस बी पाटील यांनी चोपड्या तालुक्यातील जनतेला केले होते. त्यांच्या आवाहनाला जनतेकडून लोकवर्गणी साठी उत्स्फूर्त प्रतिसाद मिळाला, त्यातून आर्थिक मदतीचा ओघ सुरू झाल्याने ,दोन ऑक्सीजन टॅंक चोपडा उपजिल्हा रुग्णालय साठी दाखल झाले आहेत.
ऑक्सीजन मुळे कोरोनाचा रुग्णांची निश्चितच प्राण वाचतील, गेल्या वर्षीपासूनच संपूर्ण राज्यात चोपडा तालुका चर्चेचा विषय ठरला आहे .कोरोनाचा महामारीत शासकीय उपजिल्हा रुग्णालयाचे कोविड 19 रुग्णालयात रुपांतर झाले .100 बेडची व्यवस्था असलेल्या रुग्णालयात दात्याकडून बेडची उभारणी करून आज 190 रुग्ण येथे उपचार घेत आहेत तर महाविद्यालयात कोविड केअर सेंटरला कमी लक्षणे असलेला रुग्णांसाठी 150 बेड व नवीन प्रशासकीय इमारतीत नुकतीच शंभर बेडची उभारणी करण्यात आली आहे
कोरोना महामारीचा संसर्ग सुरू झाल्यापासून बेडची उणीव भासू लागली त्याचा गांभीर्याने विचार करून शेतकरी कृती समितीचे समन्वयक एस बी पाटील यांनी उपजिल्हा रुग्णालयातील कोविड हेल्थ सेंटरला ऑक्सिजन पाईपलाईन साठी आर्थिक मदत करण्याचे जनतेला वारंवार सोशल मीडियावर आवाहन केले होते त्यांच्या आवाहनाला जनतेकडून भरभरून प्रतिसाद देखील मिळाला , लोकवर्गणीतून शंभर बेडची क्षमता असताना 190 बेडची व्यवस्था करण्यात येऊन त्यापैकी 90 बेडला अत्यंत कमी खर्चात ऑक्सीजन पाइपलाइन करून छोटे एक्स-रे मशीन ,विज नसताना दोन इन्व्हर्टर सोबत हॉलमध्ये काँसुलेटर मशीन बसविण्यात आले आहेत तसेच जनतेला व कोरोनाचा रुग्णांच्या सहकार्याने खाजगी पातळीवर मेडिसिन बँक उभारून इमर्जन्सीला इंजेक्शन उपलब्ध करून दिली जात आहेत ,त्यानंतर लोकवर्गणीतून महाविद्यालयातील कोविंड केअर सेंटरला कमी लक्षणे असलेल्या रुग्णांसाठी 150 बेडची व्यवस्था करण्यात आले आहे तसेच लोकवर्गणीतून नवीन प्रशासकीय इमारतीत गंभीर कोरोना रुग्णांसाठी शंभर बेडची पुन्हा व्यवस्था करण्यात आली असून त्यापैकी पन्नास बेडला ऑक्सिजन सुविधा देखील उपलब्ध करून देण्यात आली आहे. लोकवर्गणीतून शासकीय उपजिल्हा रुग्णालयात व आदी ठिकाणी एकूण चारशे पन्नास बेडची उभारणी करण्यात आली आहे त्यापैकी 140 बेडला ऑक्सिजनची सुविधा पुरवण्यात आले आहे. लोकवर्गणीतून औषधे यांसारख्या महागडी सुविधा उपलब्ध करून चोपडा तालुक्याने आदर्श निर्माण करून महाराष्ट्रात मॉडेल बनला आहे. गेल्या वर्षभरापासून सुविधा सुरळीत असताना शहरातील उपजिल्हा रुग्णालयात दिनांक 27 रोजी रात्री ऑक्सिजन सिलिंडर संपल्याने कोरोनाचे पाच रुग्ण दगावल्याची घटना घडली याबाबत रुग्णाचे नातेवाईक व उपजिल्हा रुग्णालय प्रशासनामार्फत दावे-प्रतिदावे केले जात आहेत.
कोरोनाचे दुसऱ्या लाटेत मार्च महिन्यात जवळपास सात हजाराच्या आसपास रुग्ण एकदम वाढले आणि ऑक्सिजनच्या तुटवडा भासत आहे. त्यात शासन वेळेवर पेमेंट करीत नसल्याने अधूनमधून ऑक्सीजन सिलेंडर संपल्याचे चित्र देखील निर्माण होत आहे याची दखल घेत कृती समितीचे समन्वयक एस बी पाटील यांनी पुढाकार घेतला.
