जळगाव लाईव्ह न्यूज । १९ मार्च २०२१ । जळगाव शहरातील एमआयडीसी परिसरात असलेल्या फ्लिपकार्ट कंपनीच्या इंस्टाकार्ड कुरियर सर्व्हिसच्या ऑफिसमध्ये चोरट्याने डल्ला मारला असून ३ लाखांचा ऐवज चोरून नेला आहे.
इंस्टाकार्ड (फ्लिपकार्ट) कुरियर सर्व्हिसचे व्यवस्थापक प्रवीण ढिवरे यांनी एमआयडीसी पोलिसात फिर्याद दाखल केली आहे. एमआयडीसीतील एम सेक्टरमध्ये असलेल्या ऑफिस शेजारील रिकाम्या गाळयात कुरियरचा माल ठेवण्यात येत असतो. दि.१८ रोजी रात्री ९.३० वाजता सर्व ऑफिस बंद करून घरी निघून गेले. दि.१९ रोजी सकाळी ६.१० वाजता सामान खाली करणारा शांताराम शिंदे हा तरुण आला असता त्याला दरवाजा तुटलेला आणि सामान अस्तावस्त पडलेला दिसला.
त्याने तात्काळ व्यवस्थापकांना कळविले. ऑफिसमधून चोरट्याने १६ मोबाईल आणि २ महागडे लॅपटॉप असा २ लाख ९९ हजार ४२४ रुपयांचा ऐवज लंपास केला आहे. दरम्यान, चोरटा सीसीटीव्ही कॅमेऱ्यात कैद झाला असून एमआयडीसी पोलीस शोध घेत आहे.
