जळगाव लाईव्ह न्यूज । एकीकडे नवरात्रोत्सवाचा उत्साह सुरू असताना दुसरीकडे मध्य रेल्वेकडून तांत्रिक कामांसाठी विशेष ब्लॉक घेण्यात येत असल्याने रेल्वे प्रवाशांना गैरसोयीचा सामना करावा लागणार आहे. कसारा ते आसनगावदरम्यान सुरू असलेल्या रेल्वेच्या विकासकामांमुळे जळगावसह उत्तर महाराष्ट्रातून मुंबईकडे जाणाऱ्या आणि मुंबईहून परतणाऱ्या प्रवाशांचे प्रवासाचे गणित बिघडण्याची शक्यता आहे.
कारण या ब्लॉकमुळे जळगाव भुसावळ मार्गे धावणाऱ्या सेवाग्राम, गरीब रथसह पाच महत्त्वाच्या एक्स्प्रेस गाड्यांचे मार्ग बदलण्यात आले आहेत. परिणामी, आज १४ आणि उद्या १५ ऑक्टोबर रोजी या गाड्या नियोजित मार्गावरील जळगावसह काही स्थानकांवर येणार नसल्याने प्रवाशांना पर्यायी व्यवस्था करावी लागणार आहे. त्यामुळे मुंबईकडे प्रवास करणाऱ्या प्रवाशांनी रेल्वेचे सुधारित वेळापत्रक तपासूनच प्रवासाचे नियोजन करावे, असे आवाहन करण्यात येत आहे.
तिसऱ्या मार्गिकेच्या कामासाठी विशेष ब्लॉक
कसारा ते आसनगावदरम्यान तिसऱ्या रेल्वे मार्गिकेचे काम आणि यार्डच्या विस्तारीकरणासाठी मध्य रेल्वेने १४ ते १६ ऑक्टोबरदरम्यान विशेष ब्लॉक घेतला आहे. या कामामुळे रेल्वे वाहतुकीवर परिणाम होणार असून, काही मेल आणि एक्स्प्रेस गाड्या कल्याण-कर्जत-पुणे-मनमाड मार्गे वळवण्यात आल्या आहेत. या बदलाचा फटका नाशिक, मनमाड, चाळीसगाव, पाचोरा आणि जळगाव परिसरातील प्रवाशांना बसण्याची शक्यता आहे. विशेषतः नियमित मार्गाने मुंबईकडे जाणाऱ्या प्रवाशांना पर्यायी व्यवस्था करावी लागणार आहे.
सेवाग्राम, गरीब रथसह कोणत्या गाड्या वळवल्या?
मध्य रेल्वेने दिलेल्या माहितीनुसार, पुढील पाच गाड्यांचे मार्ग बदलण्यात आले आहेत.
गाडी क्रमांक १२१३९ — सीएसएमटी-नागपूर सेवाग्राम एक्स्प्रेस: १४ आणि १५ ऑक्टोबर रोजी कल्याण-कर्जत-पुणे-मनमाड मार्गे धावेल.
गाडी क्रमांक १२१८८ — सीएसएमटी-जबलपूर गरीब रथ एक्स्प्रेस: १५ ऑक्टोबर रोजी पर्यायी मार्गाने धावेल.
गाडी क्रमांक १२५९८ — सीएसएमटी-गोरखपूर अंत्योदय एक्स्प्रेस: १४ ऑक्टोबर रोजी पर्यायी मार्गाने वळवण्यात आली आहे.
गाडी क्रमांक ११०४३ — दादर-बलिया एक्स्प्रेस: १४ ऑक्टोबर रोजी कल्याण-कर्जत-पुणे-मनमाड मार्गे धावेल.
गाडी क्रमांक ११०४७ — दादर-गोरखपूर एक्स्प्रेस: १५ ऑक्टोबर रोजी पर्यायी मार्गाने धावेल.
या मार्गबदलामुळे संबंधित गाड्यांच्या नियोजित मार्गावरील काही स्थानकांवर सेवा उपलब्ध होणार नाही. त्यामुळे प्रवाशांनी तिकीटावरील तपशील आणि रेल्वेचे अधिकृत अपडेट तपासणे आवश्यक आहे.
१४.१०.२०२६ रोजी प्रवास सुरू होणाऱ्या गाड्यांच्या वेळापत्रकात बदल
दिनांक १४.१०.२०२६ रोजी सुटणारी गाडी क्रमांक 11081 लोकमान्य टिळक टर्मिनस – गोरखपुर एक्सप्रेस आता लोकमान्य टिळक टर्मिनस येथून १६.३५ ऐवजी १७.५० वाजता सुटेल,
दिनांक १४.१०.२०२६ रोजी सुटणारी गाडी क्रमांक 12107 लोकमान्य टिळक टर्मिनस – सीतापुर एक्सप्रेस आता लोकमान्य टिळक टर्मिनस येथून १६.२५ ऐवजी १७.३५ वाजता सुटेल,
दिनांक १४.१०.२०२६ रोजी सुटणारी गाडी क्रमांक 13380 लोकमान्य टिळक टर्मिनस – धनबाद एक्सप्रेस आता लोकमान्य टिळक टर्मिनस येथून १६.५५ ऐवजी १८.०५ वाजता सुटेल.
नवरात्रोत्सवाच्या काळात अनेक प्रवासी धार्मिक कार्यक्रम, नातेवाइकांच्या भेटीगाठी आणि अन्य कामांसाठी प्रवास करत असतात. अशा वेळी रेल्वेच्या मार्गबदलामुळे प्रवाशांची गैरसोय होण्याची शक्यता आहे. विशेषतः जळगाव, पाचोरा, चाळीसगाव, मनमाड आणि नाशिक परिसरातील प्रवाशांना या बदलांचा फटका बसू शकतो.
