जळगाव लाईव्ह न्यूज । अमळनेर तालुक्यातील नगाव खुर्द येथे रेशन दुकानासाठी शासनाकडून उपलब्ध करून देण्यात आलेल्या धान्याचा परस्पर अपहार केल्याप्रकरणी दोघांविरुद्ध अत्यावश्यक वस्तू कायद्यान्वये गुन्हा दाखल करण्यात आला आहे. या कारवाईत पोलिसांनी मका, ज्वारी, साखर आणि गहू असा एकूण ६४ हजार ८१६ रुपये किमतीचा धान्यसाठा जप्त केला आहे.
या प्रकरणी पुरवठा निरीक्षक रुखसाना शेख यांनी अमळनेर पोलीस ठाण्यात फिर्याद दिली. त्यानुसार प्रमोदपुरी गोसावी व प्रवीण गोसावी यांच्याविरुद्ध शासकीय रेशनच्या धान्याचा गैरप्रकार केल्याच्या आरोपावरून अत्यावश्यक वस्तू कायद्यान्वये गुन्हा दाखल करण्यात आला आहे.
रेशन दुकानांमार्फत पात्र लाभार्थ्यांना वितरित करण्यासाठी शासनाकडून धान्याचा पुरवठा केला जातो. मात्र, नगाव खुर्द येथे या शासकीय धान्याचा परस्पर अपहार झाल्याची बाब समोर आल्यानंतर संबंधित विभागाकडून कारवाई करण्यात आली. तपासादरम्यान पोलिसांनी मका, ज्वारी, साखर आणि गहू असा एकूण ६४ हजार ८१६ रुपयांचा साठा जप्त केला.
घटनेची नोंद झाल्यानंतर पोलिसांनी संबंधितांकडून धान्यसाठ्याबाबत माहिती घेत पुढील तपास सुरू केला आहे. शासकीय धान्याचा गैरवापर अथवा अपहार करून शासनाच्या वितरण व्यवस्थेत अडथळा निर्माण करणाऱ्यांवर कायदेशीर कारवाई केली जाणार असल्याचे पोलिसांनी स्पष्ट केले.
या प्रकरणाचा तपास सहाय्यक पोलीस निरीक्षक गणेश अहिरे करीत असून, पोलीस निरीक्षक दत्तात्रय निकम यांच्या मार्गदर्शनाखाली पुढील तपास सुरू आहे.
