जळगावात घरफोडी अन् वाहन चोरी करणाऱ्या टोळीचा पर्दाफाश; लाखोंचा मुद्देमाल जप्त

जळगाव लाईव्ह न्यूज । जळगाव तालुका पोलीस ठाण्याच्या हद्दीत वाढलेल्या घरफोडी आणि दुचाकी चोरीच्या घटनांचा यशस्वी छडा लावत पोलिसांनी मोठी कारवाई केली आहे. अवघ्या काही दिवसांत १० गुन्ह्यांची उकल करत पाच आरोपींना अटक करण्यात आली असून, त्यांच्या ताब्यातून सुमारे ४ लाख ३० हजार रुपयांचा मुद्देमाल जप्त करण्यात आला आहे.

गेल्या काही दिवसांत तालुका पोलीस ठाण्याच्या कार्यक्षेत्रात घरफोडी आणि वाहन चोरीच्या घटना वाढल्याने नागरिकांमध्ये असुरक्षिततेची भावना निर्माण झाली होती. या पार्श्वभूमीवर पोलीस अधीक्षक श्रीकांत धिवरे यांच्या मार्गदर्शनाखाली विशेष तपास मोहीम राबविण्यात आली. पोलीस निरीक्षक शशिकांत पाटील यांच्या नेतृत्वाखाली स्वतंत्र पथके तयार करून तांत्रिक विश्लेषण, सीसीटीव्ही फुटेज आणि गुप्त माहितीच्या आधारे संशयितांचा शोध सुरू करण्यात आला.

तपासादरम्यान मिळालेल्या माहितीच्या आधारे गुरुजीत सिंग सुजनसिंग बावरी (२६, तांबापुरा), दीपक बापू पाटील (२५, पंचशील नगर), राजेश माणिक राठोड (२४, तांबापुरा), सुमित संजय कोळी (१९, रामेश्वर कॉलनी) आणि महेश उर्फ संतोष भोई (२४, तांबापुरा) या पाच जणांना पोलिसांनी ताब्यात घेतले. चौकशीदरम्यान त्यांनी तालुका पोलीस ठाण्याच्या हद्दीतील १० गुन्ह्यांमध्ये सहभागाची कबुली दिली.

पोलिसांच्या माहितीनुसार, उघडकीस आलेल्या गुन्ह्यांमध्ये ९ घरफोडी आणि एका दुचाकी चोरीचा समावेश आहे. आरोपींकडून घरफोडीतील सुमारे २ लाख ३० हजार रुपयांचे दागिने व इतर साहित्य, तसेच २ लाख रुपये किमतीच्या चार मोटारसायकली जप्त करण्यात आल्या. एकूण जप्त मुद्देमालाची किंमत ४ लाख ३० हजार रुपये असल्याचे पोलिसांनी सांगितले.

अटक केलेल्या आरोपींना न्यायालयात हजर केले असता त्यांना पोलीस कोठडी सुनावण्यात आली आहे. या टोळीने जिल्ह्यातील इतर भागांतही अशाच प्रकारचे गुन्हे केले आहेत का, याचा तपास सुरू असल्याची माहिती पोलिसांनी दिली.

दरम्यान, नागरिकांनी घर बंद ठेवताना आवश्यक सुरक्षा उपाययोजना कराव्यात तसेच परिसरात संशयास्पद हालचाल दिसल्यास त्वरित पोलिसांना माहिती द्यावी, असे आवाहन पोलीस प्रशासनाने केले आहे.

सदरची कामगिरी पोलीस अधीक्षक श्रीकांत धिवरे, अपर पोलीस अधीक्षक संदीप गावीत, उप विभागीय पोलीस अधिकारी नितीण गणापुरे यांचे मार्गदर्शनाखाली जळगाव तालुका पोलीस स्टेशनचे पोलीस निरीक्षक शशिकांत पाटील, सहाय्यक पोलीस निरीक्षक नयन पाटील, पोलीस उपनिरीक्षक विजय पाटील, प्रोफेशनरी पोलीस उपनिरीक्षक यज्ञजीता येडले पोहेकॉ/प्रदीप राजपूत तसेच गुन्हे शोध पथकाचे (DB Team) पोलीस हवालदार अविनाश देवरे, योगेश पाटील, नरेंद्र पाटील, श्रीकांत बदर, पोलीस नाईक कैलास इंगळे, पोलीस कॉन्स्टेबल प्रशांत ठाकूर, शरद पाटील, दिपक देवरे आणि वाहन चालक पोलीस हवालदार अशोक पाटील व पंकज देशमुख या पथकाने उत्कृष्ट व उल्लेखनीय कामगिरी केली आहे