जळगाव लाईव्ह न्यूज । २५ ऑक्टोबर २०२२ । भारतीय वंशाचे ऋषी सुनक (Rishi Sunak) हे ब्रिटनचे 57 वे पंतप्रधानपदी विराजमान झाले आहेत. द संडे टाइम्सने नुकत्याच प्रसिद्ध केलेल्या श्रीमंतांच्या यादीनुसार, ऋषी सुनक आणि त्यांच्या पत्नीची संपत्ती 730 दशलक्ष पौंड आहे. या संपत्तीसह, ऋषी सुनक ब्रिटनच्या सर्वात श्रीमंत 250 लोकांच्या यादीत 222 व्या क्रमांकावर आहेत. ऋषी आणि त्यांची पत्नी अक्षता मूर्ती यांची एकूण चार घरे आहेत.
लंडनमध्ये दोन, यॉर्कशायरमध्ये एक आणि अमेरिकेतील लॉस एंजेलिसमध्ये एक घरे आहेत. लंडनमधील त्याच्या एका घराची किंमत अंदाजे £7 दशलक्ष एवढी आहे. यॉर्कशायरमध्ये त्यांची हवेली 12 एकर जमिनीवर पसरलेली आहे. तो वाडा खूपच सुंदर असल्याचे सांगितले जाते. याशिवाय अमेरिकेतील कॅलिफोर्नियामध्येही त्यांचे पेंटहाऊस आहे. ते घरही संस्मरणीय आहे कारण बेवॉच या हॉलिवूड चित्रपटाचे चित्रीकरण तिथे झाले होते. हा तोच बेवॉच चित्रपट आहे, ज्यामध्ये देसी गर्ल प्रियांका चोप्रा ड्वेन जॉन्सनसोबत दिसली होती.
ऑक्सफर्डमध्ये शिक्षण घेतले
दरम्यान, राजकारणात येण्यापूर्वी ऋषी सुनक काय करत होते, हा प्रश्न तुमच्या मनात नक्कीच आला असेल. यूकेचे खासदार आणि चांसलर म्हणून सुनक यांचा पगार £1,51,649 आहे. पंतप्रधान झाल्यानंतर त्यात आणखी वाढ होईल. राजकारणात येण्यापूर्वी ऋषी हे दोन हेज फंडांचे स्टेकहोल्डर होते. यातून त्यांनी भरपूर पैसा कमावला आहे. याशिवाय ते एक इन्व्हेस्टमेंट बँकर देखील होते.
सुनक यांनी ऑक्सफर्ड विद्यापीठात राजकारण, तत्त्वज्ञान आणि अर्थशास्त्राचा अभ्यास केला. त्यांना प्रथम श्रेणी पदवी प्रदान करण्यात आली. नंतर त्यांनी स्टॅनफोर्ड विद्यापीठातून एमबीए केले, जिथे त्यांची अक्षता मूर्तीशी भेट झाली. अक्षता मूर्ती ही भारतीय अब्जाधीश सॉफ्टवेअर कंपनी इन्फोसिसचे मालक एनआर नारायण मूर्ती यांची कन्या आहे, ज्यांना भारताचे बिल गेट्स म्हणून संबोधले जाते. अहवालानुसार, त्यांच्या मुलीची कंपनीत 0.91 टक्के भागीदारी आहे, ज्याची किंमत सुमारे 700 दशलक्ष पौंड आहे.
बेंगळुरूमध्ये लग्न झाले
या जोडप्याने 2009 मध्ये त्यांच्या मूळ गावी बेंगळुरू येथे लग्न केले, ज्यात हजार पाहुणे उपस्थित होते. त्यांना कृष्णा आणि अनुष्का या दोन मुली आहेत.