जळगाव लाईव्ह न्यूज । जळगावसह खान्देशातील रेल्वे प्रवाशांसाठी आनंदाची बातमी आहे. ती म्हणजे गुजरात आणि ओडिशा या दोन राज्यांना जोडणारी उधना–ब्रह्मपूर अमृत भारत एक्स्प्रेस आता आठवड्याचे सर्व दिवस नियमितपणे धावणार आहे. या निर्णयामुळे उत्तर महाराष्ट्रातील खान्देश विभागातील हजारो प्रवाशांना मोठा दिलासा मिळणार आहे.
यापूर्वी ही गाडी आठवड्यातून तीन दिवस चालवली जात होती; मात्र प्रवाशांकडून मिळालेल्या वाढत्या प्रतिसादामुळे आणि वाढत्या मागणीचा विचार करून रेल्वे प्रशासनाने ती ‘दैनिक’ करण्याचा महत्त्वाचा निर्णय घेतला आहे. नंदुरबार, धुळे आणि जळगाव जिल्ह्यांतील अनेक कामगार, विद्यार्थी आणि व्यावसायिक सुरत व आसपासच्या औद्योगिक भागात ये-जा करत असतात. त्यांच्यासाठी सुरक्षित, नियमित आणि परवडणारा प्रवास हा नेहमीच महत्त्वाचा मुद्दा राहिला आहे. आता ही गाडी दररोज उपलब्ध झाल्याने प्रवासाचे नियोजन अधिक सोपे आणि विश्वासार्ह होणार आहे.
उधना–ब्रह्मपूर अमृत भारत एक्स्प्रेस ही गाडी बारडोली, व्यारा, नवापूर, नंदुरबार, दोंडाईचा, सिंदखेडा, अमळनेर, धरणगाव, जळगाव, भुसावळ, मलकापूर, अकोला, बडनेरा, वर्धा, नागपूर, गोंदिया, दुर्ग, रायपूर, महासमुंद, खरियार रोड, कांताबंजी, तितला, मुंगळगाव, मुरगाव, मुरगाव, मुरगाव येथे थांबेल. लांब पल्ल्याच्या प्रवासासाठी ही गाडी एक सोयीस्कर पर्याय ठरत असून, प्रतीक्षा यादीतही घट होण्याची शक्यता व्यक्त केली जात आहे.
नव्या निर्देशानुसार, गाडी क्रमांक १९०२१ उधना–ब्रह्मपूर अमृत भारत एक्सप्रेस जी सध्या उधना येथून रविवार, बुधवार आणि शुक्रवार या दिवशी सुटते, ती आता दररोज धावेल. त्याचप्रमाणे गाडी क्रमांक १९०२२ ब्रह्मपूर–उधना अमृत भारत एक्सप्रेस जी सध्या ब्रह्मपूर येथून सोमवार, गुरुवार आणि शनिवार या दिवशी सुटते, ती देखील आता दररोज चालवली जाईल.
