जळगाव लाईव्ह न्यूज । २६ जानेवारी २०२२ । जिल्ह्यात चोरट्यांनी धुमाकूळ घेतला आहे. दिवसेंदिवस चोरट्यांच्या घटना वाढतच आहे. अशात अमळनेर येथे पती कर्तव्य बजावण्यासाठी गेले असताना सकाळी फिरायला गेलेल्या महिलेच्या घरातून सव्वादोन लाखाचे दागिने अज्ञात चाेरट्यांनी लंपास केल्याची घटना २५ रोजी पहाटे ५ वाजेच्या सुमारास घडली.
शहरातील प्रभाकर नगरमधील वैशाली तुषार जोगी ही महिला २५ रोजी पहाटे ५ वाजेला दोन्ही मुले झोपलेली असताना परिसरातील दोन महिलांसोबत फिरायला गेली हाेती.
असा गेला ऐवज चोरीला
या वेळी अज्ञात चोरट्यांनी त्यांच्या घरातील कपाट किल्लीने उघडून कपाटातील ६२ हजार ११९ रुपयांची २१ ग्रॅम सोन्याची माळ, १ लाख २७ हजार २०० रुपयांच्या ४० ग्रॅम वजनाच्या सोन्याच्या पाटल्या, १२ हजार ३३८ रुपयांचे सोन्याचे पेंडल, १२ हजार ५०० रुपयांचा मोबाइल, १४५० रुपये रोख असा एकूण २ लाख १५ हजार ६५७ रुपयांचा ऐवज चाेरट्यांनी चोरून नेला आहे.
या प्रकरणी वैशाली जाेगी या महिलेच्या फिर्यादीवरून अमळनेर पोलिस ठाण्यात घरफोडीचा गुन्हा दाखल करण्यात आला आहे. या घटनेचा तपास पोलिस उपनिरीक्षक गंभीर शिंदे करत आहेत.