जळगाव लाईव्ह न्यूज । २९ नोव्हेंबर २०२५ । नोव्हेंबर महिना संपत आला आहे आणि त्यानंतर २०२५ चा पुढचा महिना आणि शेवटचा महिना डिसेंबर सुरू होईल. या नवीन महिन्यात अनेक आर्थिक बदल होतील ज्यांचा थेट तुमच्या खिशावर परिणाम होऊ शकतो. या बदलांमध्ये एलपीजी गॅस सिलिंडर, पेन्शन, कर आणि इंधनाशी संबंधित नियमांचा समावेश आहे. १ डिसेंबरपासून 6 प्रमुख नियम बदलत आहेत. नेमके कोणते बदल होतील ते जाणून घेऊया..
नवीन एलपीजी सिलिंडरच्या किमती
सरकार दरमहा एलपीजी सिलिंडरच्या किमती सुधारित करते आणि नवीन किमती जाहीर करते. त्यामुळे, सरकार पुढील महिन्यात देखील नवीन एलपीजी सिलिंडरच्या किमती जाहीर करेल. नवीन किमती कमी किंवा वाढवता येतात. एलपीजी सिलिंडरच्या किमती नोव्हेंबरमध्ये कमी करण्यात आल्या होत्या.
सीएनजी, पीएनजी इंधनाच्या किमती बदल
तेल कंपन्या दरमहा सीएनजी, पीएनजी आणि जेट इंधनाच्या किमती देखील सुधारित करतात आणि नवीन किमती जाहीर करतात. परिणामी, सीएनजी, पीएनजी आणि जेट इंधनाच्या किमती १ डिसेंबरपासून बदलतील.
यूपीएसमध्ये जॉईन होण्याची शेवटची संधी
केंद्र सरकारच्या कर्मचाऱ्यांना युनिफाइड पेन्शन स्कीममध्ये सामील होण्यासाठी ३० नोव्हेंबर ही शेवटची तारीख असणार आहे. एनपीएवरून युपीएसमध्ये बदल करू इच्छिणाऱ्या कर्मचाऱ्यांनी या तारखेपर्यंत सीआरए पोर्टलवर अर्ज करणे बंधनकारक आहे. अर्ज भरण्याची अंतिम मुदत चुकल्यास पुढील तारीख समोर येईपर्यंत प्रतिक्षा करावी लागेल.
कर भरण्यात विलंब झाला तर भरावा लागेल दंड
नोव्हेंबरचा शेवटचा आठवडा करदात्यांसाठी महत्वाचा असतो. टीडीएस स्टेंटमेंट दाखल करण्याची (कलम १९४-आयए, १९४-आयबी, १९४एम, १९४एस) दाखल करण्याची अंतिम तारीख ३० नोव्हेंबर आहे. कलम ९२ई अंतर्गत ट्रान्सफर प्राइसिंग रिपोर्ट सादर करणे आवश्यक असलेल्यांनीही या तारखेपर्यंत रिटर्न दाखल करावेत. तसेच भारतामध्ये काम करणाऱ्या परदेशी कंपन्यांनी फॉर्म ३ सीईएए सादर करणे बंधनकारक आहे. दरम्यान, अंतिम तारखेपलीकडे विलंब झाल्यास दंड आणि आयकर विभागाकडून नोटीस मिळण्याची शक्यता आहे.
विमान प्रवास महागण्याची शक्यता
१ डिसेंबर रोजी विमान इंधनाच्या किमतींचा आढावा घेतला जाईल. जर दर वाढले तर, डिसेंबर महिन्यात विमान तिकिटे महागण्याची शक्यता आहे. याचा थेट परिणाम देशांतर्गत आणि आंतरराष्ट्रीय प्रवाशांवर होईल.
पेन्शनधारकांना बसू शकतो फटका
३० नोव्हेंबरपर्यंत जीवन प्रमाणपत्र सादर न केल्यास, डिसेंबर महिन्यापासून पेन्शन क्रेडिट थांबवले जाऊ शकते. पेन्शनधारक हे प्रमाणपत्र बँक, पोस्ट ऑफिस किंवा अॅपद्वारे सहजरित्या सादर करू शकतात.
