जळगाव लाईव्ह न्यूज । जळगाव–पाळधी बायपासवर विचित्र अपघात घडला. काचेच्या बाटल्या घेऊन जाणारा ट्रक पाळधी जवळ उलटून एकेरी वाहतूक सुरु झाल्यानंतर मागून भरधाव वेगाने येणाऱ्या ट्रकने चार ते पाच वाहनांना धडक दिली. या अपघातात वाहन चालक किरकोळ जखमी झाले असून महामार्गावरील वाहतूक सुमारे तीन तास ठप्प होवून वाहनांच्या रांगा लागल्या होत्या.
पाळधीहून भुसावळकडे काचेच्या बाटल्या घेऊन जाणारा ट्रक भोकनी फाट्याजवळ अचानक उलटला. वाहतूक दुसऱ्या बाजूने वळविली असताना भरधाव ट्रकने चार ते पाच वाहनांना धडक दिली. दोन्ही बाजूने अपघात झाल्याने बायपासवर तीन ते चार किमी पर्यंत वाहनांच्या रांगा लागल्या होत्या. ही घटना शुक्रवारी सायंकाळी ६:३० वाजेच्या सुमारास घडली.
अपघातामुळे वाहतूक ठप्प झाल्यामुळे काही वाहनधारकांनी कचरा डेपो पासून वाहने पुन्हा जुन्या महामार्गाकडे वळवून पर्यायी मार्गाचा वापर केला. परंतू अनेकांना मार्ग न सापडल्याने त्यांना रांगेत उभे राहून महामार्ग सुरळीत होण्याची वाट पहावी लागली. या वेळी पोलिसांनी एक क्रेन बोलावून अपघातग्रस्त वाहने हटवित महामार्गावरील वाहतुक सुरळीत केली.
