जळगाव लाईव्ह न्यूज । जळगाव जिल्ह्यातील बेरोजगार आणि गरजू तरुणांना थेट नामांकित बहुराष्ट्रीय कंपनीत करिअर घडवण्याची मोठी संधी चालून आली आहे. जिल्हा कौशल्य विकास, रोजगार व उद्योजकता मार्गदर्शन केंद्र, जळगाव आणि निमजाई फाउंडेशन यांच्या संयुक्त विद्यमाने ‘टोयोटा किर्लोस्कर मोटर प्रा. लि.’ या नामांकित कंपनीत “शिका व कमवा” (Learn & Earn) योजनेअंतर्गत भव्य भरती मेळाव्याचे आयोजन करण्यात आले आहे. विशेष म्हणजे या मेळाव्यात पात्र उमेदवारांची जागेवरच निवड केली जाणार आहे.
हा मेळावा दिनांक १९ मे २०२६ रोजी सकाळी १० वाजल्यापासून निमजाई फाउंडेशन (ट्रेनिंग सेंटर, कालीका माता मंदिर परिसर, स्टेट बँक ऑफ इंडिया वर, जळगाव) येथे आयोजित करण्यात आला हे.
कोणत्या पदांसाठी मिळणार प्रशिक्षण?
या उपक्रमांतर्गत ऑटोमोटिव्ह वेल्ड टेक्निशियन, ऑटोमोटिव्ह पेंट टेक्निशियन, ऑटोमोटिव्ह असेंब्ली टेक्निशियन आणि मेकॅट्रॉनिक्स टेक्निशियन या ट्रेडमध्ये प्रशिक्षण दिले जाणार आहे. प्रशिक्षणाचा कालावधी दोन वर्षांचा असून त्यानंतर एक वर्षाची अप्रेंटिसशिपची संधी मिळणार आहे. प्रशिक्षणादरम्यान विद्यार्थ्यांना अत्याधुनिक तांत्रिक शिक्षण, प्रत्यक्ष औद्योगिक अनुभव आणि तज्ज्ञांचे मार्गदर्शन मिळणार आहे.
या भरतीसाठी १८ ते २५ वयोगटातील १०वी, १२वी, आयटीआय, डिप्लोमा, बी.कॉम व बी.एस्सी उत्तीर्ण उमेदवार पात्र आहेत. निवड झालेल्या विद्यार्थ्यांना निवासी व भोजन सुविधा, शैक्षणिक साहित्य तसेच मासिक विद्यावेतन दिले जाणार आहे. पहिल्या वर्षी रुपये १७,०८०/- तर दुसऱ्या वर्षी रुपये १८,४४१/- इतके विद्यावेतन देण्यात येईल.
इच्छुक उमेदवारांनी https://rojgar.mahaswayam.gov.in/#/home/index या संकेतस्थळावर नोंदणी करून उपलब्ध रिक्त पदांसाठी अर्ज करावा. तसेच ज्या उमेदवारांनी अद्याप नोंदणी केलेली नाही, त्यांनी आवश्यक कागदपत्रांसह मेळाव्याच्या दिवशी प्रत्यक्ष उपस्थित राहावे, असे आवाहन सहायक आयुक्त संदीप ज्ञा. गायकवाड यांनी केले आहे. अधिक माहितीसाठी जिल्हा कौशल्य विकास, रोजगार व उद्योजकता मार्गदर्शन केंद्र, शासकीय तांत्रिक विद्यालय परिसर, जी.एस. ग्राउंडजवळ, जळगाव येथे संपर्क साधावा किंवा दूरध्वनी क्रमांक ०२५७-२९५९७९० वर संपर्क साधण्याचे आवाहन करण्यात आले आहे.
