उद्यापासून धावणार पुणे-दानापूर ‘अमृत भारत एक्सप्रेस’; भुसावळसह ‘या’ स्थानकांवर मिळणार थांबा

जळगाव लाईव्ह न्यूज । भुसावळ आणि परिसरातील रेल्वे प्रवाशांसाठी आनंदाची बातमी आहे. भारतीय रेल्वेतर्फे २७ जून २०२६ पासून दानापूर–पुणे अमृत भारत एक्स्प्रेस (Amrit Bharat Express) सुरू करण्यात येत असून या गाडीला भुसावळ रेल्वे स्थानकावर अधिकृत थांबा देण्यात आला आहे. त्यामुळे भुसावळ, जळगाव आणि परिसरातील प्रवाशांना पुणे तसेच बिहारकडे जाण्यासाठी आणखी एक महत्त्वाचा रेल्वे पर्याय उपलब्ध होणार आहे.

गाडी क्रमांक आणि वेळापत्रक

पुणे ते दानापूर दरम्यान धावणाऱ्या अमृत भारत एक्स्प्रेसला ११४३१, तर दानापूर ते पुणे दरम्यान धावणाऱ्या गाडीला ११४३२ हा क्रमांक देण्यात आला आहे. ही गाडी दर शनिवारी दुपारी ३.२५ वाजता पुणे स्थानकावरून सुटून त्याच दिवशी रात्री ११.४० वाजता भुसावळ स्थानकावर पोहोचेल. यानंतर तिसऱ्या दिवशी पहाटे १.३० वाजता दानापूरला पोहोचेल. परतीच्या प्रवासात गाडी दर सोमवारी पहाटे ३.३० वाजता दानापूरहून सुटेल आणि दुसऱ्या दिवशी रात्री १२.०५ वाजता भुसावळला पोहोचेल. यानंतर त्याच दिवशी सकाळी ११.०५ वाजता पुण्यात दाखल होईल.

या स्थानकांवर मिळणार थांबा

दानापूर–पुणे अमृत भारत एक्स्प्रेसला दौंड कॉर्ड लाइन, अहिल्यानगर, बेलापूर, कोपरगाव, मनमाड, भुसावळ, खंडवा, इटारसी, पिपरिया, नरसिंगपूर, जबलपूर, कटनी, मैहर, सतना, माणिकपूर, प्रयागराज छेओकी, पंडित दीनदयाल उपाध्याय जंक्शन, बक्सर आणि आरा या महत्त्वाच्या स्थानकांवर थांबा देण्यात आला आहे. भुसावळला थांबा मिळाल्याने उत्तर महाराष्ट्रातील प्रवाशांना मोठा फायदा होणार आहे.

१८ डब्यांची आधुनिक रचना

या अमृत भारत एक्स्प्रेसमध्ये एकूण १८ डबे असतील. त्यामध्ये ८ स्लीपर क्लास, ७ जनरल क्लास, १ पॅन्ट्री कार आणि २ एसएलआर-डी (SLR-D) डब्यांचा समावेश करण्यात आला आहे. त्यामुळे सर्वसामान्य प्रवाशांसह लांब पल्ल्याच्या प्रवाशांनाही आरामदायी प्रवासाची सुविधा उपलब्ध होणार आहे.

रेल्वे प्रशासनाने सुरू केलेल्या या नव्या सेवेमुळे भुसावळकरांना पुण्याला जाण्यासाठी आणखी एका नवीन गाडीचा लाभ मिळणार आहे.