जळगाव लाईव्ह न्यूज । ६ मार्च २०२१ । महापालिकेच्या आगामी अडीच वर्षांच्या कालखंडासाठी महापौर व उपमहापौर निवडीचा कार्यक्रम जाहीर करण्यात आला आहे. महापौर भारती सोनवणे व उपमहापौर सुनील खडके यांचा कार्यकाळ १७ मार्च रोजी संपणार आहे. त्यामुळे येत्या १८ मार्च रोजी नूतन पदाधिकाऱ्यांची निवडणूक होणार आहे.
अभिजित राऊत यांच्या अध्यक्षतेखाली ही निवड होणार आहे. महापौर व उपमहापौर पदासाठी ९ ते १६ मार्च या दरम्यान सुटीचे दिवस वगळता सकाळी ११ ते दुपारी १ वाजता नगरसचिवांकडे नामनिर्देशनपत्र घेता येणार आहेत. १७ रोजी सकाळी ११ ते दुपारी २ या वेळेत उमेदवारांना नामनिर्देशनपत्र दाखल करता येईल. अर्जांची छाननी १८ रोजी विशेष सभा सुरू झाल्यानंतर होईल. छाननीनंतर माघारीसाठी १५ मिनिटे वेळ दिला जाणार आहे. एकाच जागेसाठी जास्त अर्ज आल्यास मतदान घेतले जाईल. महापौर निवडीनंतर उपमहापौरांची निवड होणार आहे.
दरम्यान, एकहाती सत्ता असलेल्या भाजपत महापौर व उपमहापौर पदासाठी इच्छुकांची गर्दी वाढत आहे. महिला सर्वसाधारण पदासाठी राखीव असलेल्या महापौरपदासाठी दोन्ही नगरसेविकांनी इच्छा व्यक्त केली आहे. तर उपमहापौरपदासाठी इच्छुकांनी नेत्यांच्या भेटीगाठी सुरू केल्या आहेत. पक्षश्रेष्ठींनी बऱ्याच जणांना आश्वासन दिल्याने ऐनवेळी कोणाचे नाव जाहीर होते याकडे लक्ष लागून आहे.
महापालिकेत शिवसेनेचे संख्याबळ कमी असले तरी भाजपतील अंतर्गत गटबाजीमुळे तापदायक ठरणारी आहे. शिवसेनेकडूनही उमेदवार देण्याची तयारी सुरू आहे. भाजपत इच्छुकांची गर्दी असल्याने नाराजांची मोट बांधन चमत्कार घडवून आणण्याची तयारी शिवसेनेकडून सुरू झाल्याचे सांगितले जात आहे. त्यामुळे शिवसेनेच्या गळाला किती नगरसेवक लागतात याकडे लक्ष लागून आहे.
