जळगाव लाईव्ह न्यूज । १८ जून २०२४ । गेल्या आठवड्यात झालेल्या घसरणीनंतर आता भारतीय सराफा बाजारात सुधारणा होऊ लागली आहे. सोमवारनंतर मंगळवारीही बाजारात वर्दळ होती. आज मंगळवारी दुपारी 12 वाजता सराफा बाजारात सोन्याच्या दरात 90 रुपयांनी तर चांदीच्या दरात 130 रुपयांची वाढ झाली.
यानंतर देशातील सराफ बाजारात 22 कॅरेट शुद्ध सोन्याचा भाव 65,743 रुपये प्रति दहा ग्रॅम झाला. तर 24 कॅरेट सोन्याचा भाव 71,720 रुपये प्रति 10 ग्रॅम झाला. मात्र गेल्या महिन्याच्या तुलनेत सोन्याचे भाव अजूनही खूपच कमी आहेत. तर मंगळवारी दुपारी 12 वाजता चांदीचा दर 89,380 रुपये प्रति किलोवर होता.
MCX वरील सोने चांदीचे दर
जर आपण मल्टी कमोडिटी एक्सचेंज (MCX) बद्दल बोललो, तर सोन्याची किंमत 0.19 टक्क्यांनी म्हणजेच 135 रुपयांच्या वाढीसह 71,585 रुपये प्रति 10 ग्रॅमवर व्यवहार करत आहे. त्याच वेळी, चांदीचा भाव 0.20 टक्क्यांनी वाढून 177 रुपयांनी 88,997 रुपये प्रति किलो झाला आहे.
सोने प्रतितोळा 80 हजार तर चांदी एक लाखावर जाणार
आंतरराष्ट्रीय घडामोडी प्रामुख्याने सोने-चांदीच्या दरांवर पडसाद पडत असतात. दिवाळीपर्यंत सोन्याचे दर प्रती तोळा 80 हजार तर चांदी प्रती किलोचे दर 1 लाख रुपयांपर्यंत पोहचण्याचा जाणकारांचा अंदाज आहे. चालू वर्षाच्या जानेवारी 2024 मध्ये सोन्याचे दर 64000 होते. ते सहा महिन्यात (जून 2024पर्यंत) 72000 रुपयांपर्यंत पोहोचले. तर चांदीचे 78,600 प्रती किलोचे दर 11 ते 12 हजार रुपयांनी वाढून 90000 रुपये झाले आहेत. सध्या सोन्याच्या दरात फारशी तेजी नसली तरी घसरण होत नाही. मात्र, चांदीचे दर हजार दोन हजाराने वाढून पून्हा खाली येणे सुरु आहे. या स्थितीत जुलैत बदल होवून दरात तेजीला सुरुवात होऊ शकते. दिवाळीत सोन्याच्या आजच्या दरात साडेसात ते आठ हजार रुपयांची वाढ होऊन सोने प्रती तोळा 80 हजार रुपयांपर्यंत पोहचेल. तर चांदीत 9 हजारांची वाढ होवून प्रति किलोचे दर 1 लाखावर जाण्याचा अंदाज आंतरराष्ट्रीय सोने बाजाराचे जाणकारांनी वर्तविला आहे.
