जळगाव लाईव्ह न्यूज । बाजार करून आपल्या गावी परतणाऱ्या एका ८३ वर्षीय वृद्धाला भरधाव बसने चिरडल्याची घटना मुक्ताईनगर तालुक्यातील कुऱ्हा काकोडा येथे घडली. सुपडा निनू सोनवणे (वय ८३, रा. निमखेडी बुद्रुक, ता. मुक्ताईनगर) असे मयत वृद्धाचे नाव असून याबाबत अकस्मात मृत्यूची नोंद करण्यात आली आहे.
काय आहे घटना ?
मुक्ताईनगर तालुक्यातील निमखेडी बुद्रुक येथे वास्तव्यास असलेले सुपडा सोनवणे हे बुधवारी कुऱ्हाकाकोडा येथे बाजार असल्याने ते गेले होते. बाजार करून ते पायी घरी येत असताना त्यांना बस (एमएच २० बीएल १७७०) ने धडक दिली. धडकेमुळे सुपडा सोनवणे हे गंभीर जखमी झाले. जखमी अवस्थेत त्यांना तातडीने जळगाव येथील जिल्हा शासकीय वैद्यकीय महाविद्यालयात उपचारासाठी दाखल करण्यात आले. मात्र, तेथे वैद्यकीय अधिकाऱ्यांनी तपासणीअंती त्यांना मृत घोषित केले.
या दुर्घटनेबाबत जिल्हापेठ पोलीस ठाण्यात अकस्मात मृत्यूची नोंद करण्यात आली असून, पोलीस या प्रकरणाचा पुढील तपास करत आहेत. या अपघातामुळे निमखेडी बुद्रुक आणि परिसरात हळहळ व्यक्त होत आहे.
