जळगाव लाईव्ह न्यूज । जळगाव जिल्ह्यातील गरजू व आर्थिकदृष्ट्या दुर्बल रुग्णांसाठी दिलासादायक उपक्रम म्हणून जळगावच्या जिल्हाधिकारी कार्यालयात १ मे रोजी मुख्यमंत्री सहायता निधी व धर्मादाय रुग्णालय मदत कक्ष कार्यान्वित करण्यात आला आहे. हे मदत कक्ष जिल्ह्यात प्रथमच सुरू झाले असून यामुळे उपचारासाठी आर्थिक अडचणीत असलेल्या रुग्णांना थेट मदतीचा मार्ग मोकळा झाला आहे.
ग्लोबल कॅन्सर हॉस्पिटल, जळगाव येथे उपचार घेत असलेले श्री दौलत बंडू सोनवणे हे दिनांक ०८ मे रोजी कर्करोगाच्या उपचारासाठी जिल्हास्तरीय मुख्यमंत्री सहायता निधी व धर्मादाय रुग्णालय मदत कक्ष, जळगाव येथे माहितीसाठी व मदतीसाठी आले होते. त्यानुषंगाने योग्य ती प्रक्रिया पूर्ण करून उपचारासाठी 1 लाख रुपये मदत मुख्यमंत्री सहायता कक्षाकडून देण्यात आली. तसेच न्युक्लियस हॉस्पिटल येथील रूग्ण जिजाबाई अशोक पाटील यांना उपचारासाठी 1 लाख रुपये मदत मुख्यमंत्री सहायता कक्षाकडून देण्यात आली.
त्यानुषंगाने दिनांक १६ मे रोजी जळगाव जिल्ह्याचे पालकमंत्री ना. गुलाबराव पाटील यांच्या हस्ते व जिल्हाधिकारी आयुष प्रसाद यांच्या प्रमुख उपस्थितीत दौलत सोनवणे व जिजाबाई पाटील या दोघांच्या नातलगांना प्रातिनिधिक स्वरुपात मुख्यमंत्री सहायता निधी मंजूरी पत्राचे वितरण करण्यात आले. रुग्ण व नातलग यांनी मुख्यमंत्री देवेंद्र फडणवी व रामेश्वर नाईक यांच्याप्रती आभार व्यक्त केला आहे.
